讚魔童牙尖嘴利 張智霖︰靚靚唔夠阿仔拗

張智霖（Chilam）前晚到亞洲博覽館為佛教活動擔任表演嘉賓，有傳他早前與太太袁詠儀（靚靚）在機場吵架，他笑笑口否認嗌交，又透露兒子張慕童（魔童）遺傳了父母的口才，現時連靚靚也不夠囝囝辯駁。

張智霖前晚出席佛教活動，本身是佛教徒的他曾想過短期出家︰「我試過閉關，但我覺得自己仲係心浮氣躁，所以未係時機。其實只係要禁語三日都好難，先試下一日唔玩手機先。」他表示今年除了到訪不丹，一家人也去過尼泊爾及印度等佛教聖地︰「阿仔三個月大，已經跟我哋去尼泊爾嘅加德滿都，因為當時有位寧波車圓寂。囝囝好有佛緣，可以坐定定聽經。」

另外，有指Chilam與靚靚早前被拍到在機場爭執，Chilam聞言搞笑說︰「聽到都覺得好笑，我哋平日係會為芝麻綠豆嘅事嘈，始終係兩個人，好難會一致，但嗰日我哋真係無嗌交。仲有睇相都見靚靚行得好快，大家成日問當年係咪我追佢，依家真相大白，佢行得咁快我點追。」

自誇有律師潛質

Chilam又自誇口才了得，有潛質做律師︰「我牙尖嘴利，嗌交我一定贏，但嗌贏唔會贏咗個關係，所以太無謂，我都會收口。」他大讚現年12歲的囝囝口才青出於藍，令他們甘拜下風︰「靚靚都唔夠個仔拗，阿仔啲切入點好厲害，不過我盡量都唔會喺個仔面前同老婆嘈，會提醒自己，但有時都忍唔住窒老婆幾句。」

撰文︰Pauline

編輯︰李潔盈

美術︰招潤洪