謝天華震住抱家燕姐

薛家燕將於下月舉行紅館演唱會，前晚她與表演嘉賓謝天華一同排舞，天華使出一招「公主抱」，man爆抱起家燕姐，但他明顯谷到面紅氣喘。事後他搞笑說︰「依家揸咪都手震！」

薛家燕與謝天華前晚綵排一曲《再共舞》，二人不但面貼面大跳貼身舞，天華在最後動作更以一人之力抱起家燕姐，抱足幾秒才放低。風騷不已的家燕姐見天華谷到面都紅晒，忍不住安慰說︰「攞佢命，辛苦晒！」傳媒要求天華再抱起家燕姐拍照，他即說︰「一日只可做一次，24小時後啦！」但家燕姐出聲要求下，他先找來四位猛男傍實，再頂硬上抱起家燕姐拍照。

湊仔當舉重

事後天華表示為家燕姐60周年個唱任嘉賓，感到十分榮幸︰「收到電話好開心，但壓力開始嚟，因為同咁有分量嘅前輩合作。」家燕姐聞言笑答︰「你講體重呀？」天華又搞笑說︰「我知道有咁高難度嘅動作（公主抱），所以日日湊仔女當練舉重！依家我連揸咪都手震。」家燕姐表示已積極減肥︰「我減咗六、七磅，仲差三磅就達標。其實我幾重㗎，不過好多人都想抱我，黎小田都想㗎，但會一齊跌落地！」另外，家燕姐透露個唱的歌衫會好少布，相當性感，天華即說︰「家燕姐60年嘅事業喎，梗係要畀觀眾睇下幾有事業心啦。」

撰文︰Pauline

編輯︰李潔盈

美術︰梁政敏