最近播出的TVB新劇《救妻同學會》觀眾反應麻麻，更有人批評演員平均年齡高過30歲，與青春拉不上關係，但講真以年齡來抺殺演員的努力未免太殘忍，好彩有網民在劇中發現滄海遺珠，佢就係飾演「賤佬」張梓健、今年30歲的黃庭鋒，原來佢唔單止睇得，仲識四種語言兼係中大碩士，但加入TVB兩年都無乜發揮機會，難怪有網民大鬧TVB浪費人才，為黃庭鋒抱不平，「點解TVB咁少後生好戲嘅人，咪就係因為機會少囉！」、「其實黃庭鋒條件唔差，但都要等兩年咁耐先叫有少少機會，到底TVB諗乜？」
其實又難怪網民心痛，事關黃庭鋒堪稱十項全能，他曾到日本留學，能操四種語言日文、英文、廣東話與普通話，而且運動才能高，堪稱港版足球小將。中學時黃庭鋒就讀英國的Old Swinford Hospital，該校學生除了學術成績優異，更聘請前職業足球員Dale Rudge作為教練，培訓學生足球技巧，所以黃庭鋒讀書時體育成績已非常標青。去到高中時期，黃庭鋒是學校足球隊唯一一位亞洲球員，更去過阿根廷與智利踢校際賽，奪得MVP（最有價值球員）獎。他原本有機會去阿士東維拉與狼隊青年軍試腳，有機會成為職業球員，但因撞正考試而被逼放棄。
足球夢碎後，黃庭鋒決定回港半工讀中文大學體育系碩士，一邊讀書一邊擔任體育老師，之後又加入TVB轉行做演員，在TVB的兩年期間，黃庭鋒更要賺錢養家，令他承受沉重壓力：「有時工作會同讀書撞時間，而且最後課程比較難，半工讀既壓力好大，連拍攝既時候都要睇住溫習筆記，多次想過放棄，最後要延期讀咗兩年半先完成。最愛爸媽默默支持，從來唔會比壓力，佢地會用任何方法鼓勵我！」幸而幾經波折黃庭鋒最近終於畢業，在無後顧之憂的情況下，假若TVB肯畀機會，相信肯定前途無呀！
▼中大碩士畢業
▼運動天份高，是「港版足球小將」
▼識四種語言，英文、日文特別勁