寶珠姐陳寶珠在娛樂圈屹立多年，至今依然是一線巨星，除有賴亮麗外表、出眾演技外，人品亦是最大的成功元素！好似今日寶珠姐以香港血癌基金愛心大使身份，到尖沙咀與余文樂出席聖誕籌款活動，寶珠姐一出場，成班粉絲即大叫：「陳寶珠嚟喇！」反應十分熱烈。寶珠姐除咗呼籲大家捐錢行善，亦有透露工作近況：「嚟緊聖誕應該都係留喺屋企，好唔得閒，因為遲啲西九戲曲中心開幕，我哋任姐一班徒弟會一齊演出粵劇，心情好緊張。」
主持完簡單而隆重的儀式後，活動亦好快完結，一般藝人做完活動，大多會即時離開，不過寶珠姐睇見粉絲咁熱情，就選擇留低同佢哋逐一握手，弊在寶珠姐嘅魅力實在太驚人，佢一伸手行近粉絲，大家即時陷入瘋狂狀態爭相上前，搞到場面混亂、一度失控，其中一名粉絲更幾乎仆倒，寶珠姐見狀即時唔理自身安全，上前扶住對方！睇見寶珠姐嘅表現，大家明點解佢可以紅足咁多年啦！
樂仔分享湊仔經
至於同場的余文樂，講到今個聖誕對他來說別具意義：「今年應該會係最難忘既聖誕，因為係第一年做爸爸，好有人生意義。」不過現場所見，樂仔同一班小朋友用積木砌全家幅嗰陣，就似乎顯得好狼狽唔知點搞，睇嚟佢都要加把勁惡補吓玩具呢科先得咯，唔係點做廿四孝爸爸呀！