問心!近呢幾年,有幾多人仲會關心乜嘢樂壇頒獎禮?不過多得古天樂今年有份角逐叱咤我最喜愛的男歌手,令叱咤再次成為全城熱話,大批網民仲發起一人一票推古仔入圍,而今日叱咤終於公布男歌手五強名單,古仔不負眾望成功入圍,將會同張敬軒、陳奕迅、陳柏宇同周國賢爭男歌手,唔少人都好期待古仔喺1月1號嘅叱咤頒獎禮上攞獎,事關按傳統,每位得獎歌手都要上台表演,到時大家除咗可以聽古仔唱live,當然唔少得經典拜神舞啦!
至於我最喜愛的女歌手方面,容祖兒、衛蘭、謝安琪、Gin Lee與及離開咗大家嘅盧凱彤,成功入圍五強。組合方面,除咗有Supper Moment、RubberBand、Dear Jane同Robynn & Kendy,呢啲見慣見熟嘅名字之外,仲有姜濤嘅Mirror,真係夠晒驚喜!由於「我最喜愛」系列的獎項,都是由頒獎禮的觀眾一人一票選出,所以最終古仔同Mirror能否封王,就真係要靠大家啦!