岑麗香肚凸凸接受祝福

岑麗香（香香）結婚兩年，身邊不少好姊妹已榮升靚媽，她昨日出席活動時，唔聲唔聲原來孕味甚濃，雖然未有親口報喜，但揚言會在適當時候講。

香香昨日獲邀出席一田百貨活動，穿上Deep V泡泡裙的她，腳踏三吋高踭鞋，受訪時見一向身形纖瘦的她忽然臉圓圓、肚凸凸兼腰肢變粗，上圍亦明顯升Cup，現場索到一陣「孕味」。問香香是否要恭喜她？她一臉尷尬說︰「恭喜乜嘢？條裙有少少『泡』嘅效果啫。（未夠日子唔講得？）我會喺適當時候講，畀少少時間我，我要消化一下，努力中。」

香香直認現階段是休息中，學習煲湯，預計聖誕節前返加拿大過節。她說︰「飛來飛去，幸好身體很容易適應時差，（老公強強有無叫你小心？）佢比我仲辛苦，因為工作更忙碌。」離開前，記者再三叮囑她要小心出入，不要穿高跟鞋，香香聞言大笑回應︰「多謝！」

此外，同場擔任司儀的區永權被問到好友張栢芝誕B的傳聞時，他表示︰「我都係睇報道才知道呢個消息，當然有少少驚訝，唔知真定假。」

撰文︰Pauline

攝影︰林良明

編輯︰陳禮恒

美術︰梁政敏