當子女開始上中學，經常嫌棄父母囉唆，很多家長都會擔心與他們距離拉遠，但其實世上最偉大的就是母愛。來到《女人四十》最終回，田蕊妮重返母校，與一眾好友和師妹，與及他們的母親訴說母女點滴，當中畢業於浸會大學視覺藝術系的Kosa羅詠怡，雖然如今大學畢業，但原來在中學時期竟是一位問題學生，不僅偷試卷，仲成日激親父母。直至媽媽不幸患癌，Kosa先識驚兼感到內疚自責，令母女關係和好如初。聽見咁感人嘅故事，搞到田蕊妮都忍唔住爆喊，場面感人。
母親患癌改寫一生
Kosa現在是KOL兼鐳射切割雕刻家，閒時仲會擔任TVB節目《#後生仔傾吓偈》嘉賓，雖然如今看似前途一片光明，但原來她自小是個問題學生，中學時比較反叛。
Kosa中學時就讀band1中學，雖然同學大多是是乖學生，但當時她偏偏結識了一群壞學生。曾經試過上課中途突然曠課離校行街、食飯，甚至試過偷試卷、更突然反枱威脅老師，又故意犯下多條校規，她接受晴報訪問時憶述：「我有大部份嘅時間都唔使上堂，好似唔使返學咁，因為老師都會罰我出去企。」結果當然要常常見家長，連老師都對她失去希望更直言：「你個女冇得救㗎喇！可唔可以叫佢轉校？」不過愛女心切的媽媽未曾罵過Kosa。令Kosa從未知驚，天天只顧與朋友玩樂、搞事，與媽媽接近零溝通，母女關係愈來愈差，甚至去到惡劣境地。
直至Kosa去到中四，媽媽不幸患上癌症，這消息對一家人的打擊無比巨大，猶如晴天霹靂，Kosa邊說邊哽咽：「細個覺得生cancer係好大件事，我好驚媽咪會死，好驚佢會離開我。」去到媽媽入院不停做化療，Kosa每日都祈禱，希望她快點康復，而當目睹媽媽進行化療時如此辛苦，Kosa每晚都發惡夢，流出來的淚水浸濕半邊枕頭……那時候Kosa終於意識到要聽話，反思之前所做的一切，後悔以前的自己令家人失望：「如果媽咪呢個時候離開咗，而佢最後一段時間見到我嘅形象都係咁差，喺佢眼中都係個唔乖嘅小朋友，咁我一定會後悔一世。」自始之後，Kosa決心做好自己，改過自身，不要再令媽媽擔心，從而加重病情。
後來媽媽見到Kosa的進步，二人關係愈來愈好，最終成功戰勝癌魔，現在她們關係猶如朋友，媽媽有一門小生意，進行布藝手作，而她就做媽媽的專屬模特兒，不過Kosa坦言媽媽仍然很喜歡嘮叨，而她則會以此回應：「我已經大個喇！」如此深情的演繹，難怪令同樣曾經講過很多傷害父母說話的阿田，亦不禁哭成淚人：「其實個女同阿媽嘅關係好矛盾㗎，你永遠最錫佢，但又覺得佢係最煩嘅人，佢講嘅嘢你冇一句會聽得入耳。」
正所謂養兒一百歲，長憂九十九，無論幾多歲，做人媽媽永遠覺得女兒還是小朋友，Kosa媽媽就指女兒如今變得很忙，大家見面的時間又再減少，內心有點失落。Kosa聽到即深感內疚，一度激動到哽咽：「因為佢唔係好多friend，變咗佢想去旅行或者去邊度，我作為佢最好嘅朋友一定會陪佢去......讀書嘅時候仲可以做到，做嘢就會少咗好多機會，有時聽唔到佢想講嘅嘢。」
田蕊妮憶亡母：嗰陣想佢活得開心
阿田與在場的嘉賓聽完她的內心話都不禁灑淚，反思與媽媽的關係。阿田憶述中學時期與媽媽關係反而是最親密，當時媽媽會送她上學，接她放學，二人見面時間很多，所以阿田有任何事需要幫忙，都會第一時間大叫：「媽咪！」但兩代關係隨着兒女長大變得疏離，去到工作時期，有很多事情已經不再告訴她。阿田坦言表面上不想媽媽擔心自己，實際上其實不知道該如何重拾那種親密。
直至媽媽年屆40，阿田已有自己的生活。田媽媽要接受她已經長大；要接受她嫌自己囉嗦、煩擾，但其實阿田最終只想媽媽幸福：「嗰陣想佢唔好諗咁多嘢，只係想佢活得開心！」沒多久，阿田都來到女人40，回想媽媽患癌過身前講了最後一句話：「我準備好喇！」令阿田感觸良多，隔空與亡母對話：「我準備好去行我未行完嘅路，珍惜身邊所有人，用心感受即將發生嘅每一件事。」希望母親在天之靈不用擔心自己。