化身飛天小女警 同多啦A夢學隱形 經典卡通陪你過聖誕

踏入12月，距離聖誕節又近咗一步，當然唔少得繼續周圍睇聖誕裝飾！黛安知道，今年唔少商場嘅聖誕裝飾都揀咗膾炙人口嘅卡通人物做主題，好似有飛天小女警、多啦A夢、布甸狗等，夠晒聖誕氣氛之餘，亦幫大家重溫童年回憶，打卡影相都特別開心！

飛天小女警3位主角花花、泡泡同毛毛，可以話係陪住唔少人成長，黛安都唔例外！適逢佢哋踏入20周年，嚟緊會同新鴻基地產旗下新蒲崗Mikiki及5大商場聯手，為大家帶來6大特色聖誕場景裝置。黛安知道，即日起Mikiki中庭就會變身成充滿節日氣氛嘅「Power Up聖誕小屋」，嚟到除咗可同一眾3D角色合照，仲可以親自創造專屬嘅飛天小女警新角色。

講到童年回憶，點少得大人細路都鍾意嘅多啦A夢？即日起「多啦A夢秘密道具研究所」就會登陸奧海城，入面會有個巨型同多項秘密道具測試站，好似有隨意門、時光機、空氣炮等，連藝人森美都玩得好開心，仲親身試咗隱形斗篷隱形嘅功效，睇到黛安好羨慕，好想快啲去試玩啊！

仲未夠？布甸狗都等緊你！荃灣廣場即日起至出年元旦，將呈獻「荃灣廣場×Pompompurin部屋聖誕派對」，場內會展示由布甸狗打造、充滿聖誕氛圍嘅部屋，仲有一系列限量布甸狗主題精品畀粉絲換領。而且喺聖誕期間，商場亦會舉行「快閃巡遊表演」呀！

而德福廣場今年亦同德國百年泰迪熊品牌Steiff攜手打造「泰迪熊聖誕」，焦點展品係有4米高、用路德維希二世國王造型亮相嘅毛毛泰迪熊，同埋以夢幻德國新天鵝堡為設計藍本嘅主題裝置，加上浪漫嘅飄雪效果，絕對係閨蜜及情侶打卡首選啦。咁多好地方，睇嚟黛安都要約定成班好姊妹，齊齊去打卡Selfie先得喇。