TVB新劇《救妻同學會》播出以來，於網上負評不絕，不過網民又唔係只識吹毛求疵嘅。劇中飾演「綁架犯」的鄧智堅，就憑出色演技獲網民一致讚賞，原來佢唔止係演藝學院高材生，畢業後更開班授徒，娜姐周秀娜都係佢嘅徒弟，而一直活躍於舞台劇界嘅鄧智堅，更獲黃秋生、馬浚偉點名稱讚，呢位綁架犯絕對有力奸出個未來！
鄧智堅IG
劇情講述鄧智堅飾演的綁架犯，先把朱智賢棄於荒山野嶺，幸得飾演登山客的程浩駿救出，但其後兩人卻被鄧智堅發現，展開奪命追逐戰，期間鄧智堅心狠手辣用槌連環攻擊，完美演繹兇徒喪心病狂一面，就連網民都睇到大嗌肉緊：「佢真係做得好逼真，唔好殺咗我嘅朱朱啦」、「呢個綁架犯係乜水？佢嘅戲直頭好過主角」對於網民讚賞，鄧智堅就好開心咁話：「今次《救妻同學會》演綁架犯。多謝監製、導演嘅信任，發掘小弟不一樣嘅可能性，電視劇嚟講我仲係新人，多多指教。」
電視截圖
雖然鄧智堅喺電視劇係新人，但原來佢早喺舞台界闖出名堂，於演藝讀書嗰陣已獲得「傑出演員獎」，畢業後即獲詹瑞文垂青，參演名作《潮性辦公室》，之後又勇闖影壇於《人間喜劇》同杜汶澤大鬥演技。演出經驗豐富的鄧智堅其後演而優則教，開班授徒，周秀娜、C allstar成員釗鋒、Supergirls、陳嘉寶、周志文、湯怡同麥貝夷都係佢徒弟，可謂桃李滿門。而且佢依家仲係戲劇團體「心靈客棧」嘅藝術總監，又會做埋導演兼編劇，如此多才多藝，難怪黃秋生套《夕陽戰士》都請佢參演，秋生仲大讚佢演技媲美同樣是舞台界出身、金像獎新人獎得主凌文龍，而馬浚偉亦點名大讚鄧智堅係好好嘅演員，得到咁多前輩賞識，相信假以時日，鄧智堅一定能喺公仔箱發光發熱呀！