12月15號就係劉德華跨年演唱會開show的大日子,雖然最近華仔忙於綵排,不過佢都無忘記一班粉絲,最近就拍片喺網上同大家分享近況,講到1993年喺紅館舉行處男show,華仔就話當時無太大壓力,反而第一次喺伊館開騷先係最緊張:「因為係同張學友、劉美君、杜德偉同林憶蓮一起合演,未出場前真係非常緊張,每一位同台歌手都好有實力、能歌善舞,而我連唱《情感的禁區》都可能入唔到歌。」不過隨著實戰經驗愈來愈豐富,華仔笑言已經絕少有怯場壓力,就算一口氣開幾十場演唱會都難佢唔到。雖然華仔充滿自信,不過佢班同事竟然唔係咁睇:「今次會加入音樂劇情節同埋medley串燒歌,但同事對我體能無信心,話似老人家開show,叫我唔好跳咁多舞,但如果只靠歌藝撐足全場,我可能會有壓力。」
講完演唱會,華仔仲有好消息宣布,就係明年會推出廣東碟,但貴為銷量保證的他竟然話如今除咗自己之外,已經好少人會投資廣東碟,就連佢亦對銷量很悲觀:「其實依家要賣三千隻已經好難!但廣東話就是廣東話,我會繼續努力做音樂。」連華仔都咁悲觀,唔通香港樂壇真係無都做?
網上截圖