林秀怡早前因為同助理編導男友於車廂激咀而人氣急升，最近佢仲踩過界翻拍張智霖同許秋怡的經典MV《現代愛情故事》，不過男主角竟然唔係佢位PA男友，而係林景程，大家唔好誤會佢移情別戀呀，實情係為咗照顧粉絲咋，事關最近佢哋有份演出嘅TVB台慶劇《是咁的，法官閣下》，雖然已經曲終人散，但就無交代林秀怡到底情定黎振燁抑或布大狀林景程，惹嚟唔少粉絲投訴，所以佢就透過MV話畀大家聽，最終揀咗林景程。
MV截圖
既然要重現經典，佢哋無論係畫面、髮型以至服飾都盡量抄足原版，雖然林秀怡表明由於成本所限，一切都係淘寶貨，不過就獲網民大讚係神還原，事關林秀怡連許秋怡套鴛鴦色衫袖都搵到，而林景程嘅迷彩look已經夠煞食，再學足chilam嚟一個回眸一望，驟眼睇真係有啲同chilam撞樣架！不過講到重頭戲當然係上演當年嘅經典沙灘牽手慢步啦，哇！真係那些年的難忘回憶返晒嚟呀！雖然張智霖嘅原版係90年代出品，但對比今日啲所謂MV絕不輸蝕，竟然出動埋直昇機，搞到林秀怡同林景程呢對A貨都好頭痕，最後佢哋諗到用遙控直昇機頂替，拍出嚟嘅畫面又幾真喎！
MV截圖