洪永城最怕大帥哥半夜留言捽對白

由張衞健（Dicky）、蔡思貝及洪永城（Tony）擔演的新劇《大帥哥》前晚推出，眾演員相約在佐敦一齊飯聚睇首播。但Dicky與太太張茜身在南非度假未能出席，他不忘拍片支持大家，張茜更以素顏出鏡。

張衞健在片中表示很想同大家一齊睇首播，但應承了老婆外遊，如果「放飛機」就會被身邊的老虎乸咬。之後他落車揸住被獅子咬剩得骨頭的水牛合照，笑言︰「大帥哥都咁話，大帥哥唔係鐵打。」最後他更教導黑人司機以廣東話宣傳劇集︰「大帥哥好掂，大帥哥型到噴汁！」十分搞笑。

明天35歲生日的洪永城，獲大會送上蛋糕慶祝，Tony表示生日當天將會到北京宣傳劇集。談到他與Dicky一同角逐視帝及「最受歡迎電視男角色」獎，Tony隨即呼籲大家投票給Dicky，他說︰「今次係我演過最鍾意嘅角色，好有層次，亦正亦邪。但觀眾點揀都好，都希望將視帝一票投畀Dicky。」他坦言劇集播出兩周就到頒獎禮，觀眾未睇到戲肉，始終有少少蝕底。

網民讚蔡思貝余德丞登對

Tony又爆料稱，跟Dicky合作比想像中融洽，反而其他同事對Dicky有點怯，「我直頭豁出去啦，有咁叻嘅老師，跟佢指示做已經無包袱。不過，反而最怕半夜三更收到佢啲兩、三分鐘嘅message，佢會好用心調整對白，甚至幫你做埋功課，所以整個團隊都好尊敬佢。」

蔡思貝憑《大帥哥》入圍視后和「最受歡迎電視女角色」獎，她說信心不大，反而希望與余德丞當選「最受歡迎電視拍檔」，直言遇到好拍檔不容易。日前余德丞上載和思貝的合照拉票，有網民指她們登對，更期待二人拍拖，思貝笑言︰「我哋就好似當年洪永城同黃翠如，係好拍檔非情侶。好朋友先可以互窒，我哋最多只係兩兄妹。」

採訪︰Pauline

攝影︰林良明

編輯：陳禮恒

美術：招潤洪