黃子恆嘅偷嗒內地粉絲風波，可謂轟動全城，今日更橫掃各大娛樂版成為C1頭條，到底佢同嗰名粉絲Michelle係乜嘢關係？人哋有咗4個月，黃子恆係咪經手人？面對一大堆疑團，佢當然難逃傳媒追訪，就連TVB都派咗兩隊人搵佢，不過面對公司同事兼娛樂記者利穎兒嘅不斷追問，黃子恆雖然努力扮到情深款款，強調願意承擔責任，但就竟然變成充滿喜劇效果：「其實我想講嘅嘢好簡單㗎咋......呢年半，我已經冇再同佢見面，所以如果當然佢所講嘅嘢有發生嘅話我一定要負責任，但呢年半已經冇再見面。」之後即使利穎兒再追問件事來龍去脈，又問雙方有冇聯絡，但佢竟然連續3次機械式回答：「我要回應嘅野都回應咗㗎喇！」搞到利穎兒都忍唔住笑咗出嚟，而呢一笑就引發網民無限聯想，有人覺得係笑佢個膠款情深樣，又有人話可能係笑佢啲大話太低B喎！
其實唔止網民咬住佢唔放，大批記者亦繼續挖佢嘅威水史，有報道指身為TVB藝人嘅佢最鍾意喺電視城搵食，唔止追過李佳芯、吳若希，就連新聞主播張文采、羅鈺文都唔放過，又有指佢曾多次邀約歌手迪子到佢屋企，仲話想同迪子「抱得緊緊的」，睇嚟佢嘅興趣都幾廣泛。而由於是非多籮籮，有指黃子恆已被公司高層急召照肺，難逃入雪櫃厄運，有唔少網民仲估佢會步背妻偷食嘅主持李潤庭後塵，敗走TVB喎！到底最終黃生結局係點？大家就要拭目以待喇！
▼女事主Michelle