亂遊澳洲 黃翠如閨密親過蕭正楠

黃翠如昨日到旺角出席朱古力活動，她表示早前相約閨密去澳洲玩了一轉，兩個女仔胡亂在街上截順風車，幸好家人和男友蕭正楠亦早已習慣她那「大難不死命」，九日旅程順利完結，本來翠如又心思思出走大馬，卻遭男友拒絕！

黃翠如表示由於今個聖誕節要開劇，因此趁開工前相約閨密去澳洲旅行，她形容這次旅程是「亂咁嚟」，事前全無計劃也沒看地圖，只租了一架車隨心去到邊玩到邊，入夜才搵酒店，其中一晚去到自然保護區，遇到一個好心的當地人，入住他和家人位於山頂的木屋，對方還送了許多朱古力和酒給她們。翠如笑指她們每次旅行雖然都是亂衝亂撞，但每次經歷都是美好的，所以不會害怕。

煲湯補償男友

被指「飛甩」男友蕭正楠（Edwin）去旅行，翠如笑言︰「喺澳洲期間Edwin不斷message我，但唔係擔心，其實佢依家嘅心態同我父母之前一樣，開頭會擔心，但之後見我每次都大難不死就由得我，仲要酸溜溜話自己要開工，而我就去玩！」翠如笑言為了補償丟低男友，日前初次煲湯給他飲，但只是買現成湯包︰「佢都好感動呀，不過就話唔好飲囉。（咁無誠意？）都有信心好過我自己執材料，下次買夠兩個湯包應該會甜啲。」

翠如又笑言原本打算開劇前再飛多轉去大馬探閨密，卻遭Edwin拒絕，男友見她和閨密經常孖住去玩，還戲言要翠如在他和閨密之間二揀一，他自覺會輸。翠如解釋與閨密0從小玩到大，一同經歷很多，實在很難分離。

採訪︰Pauline

攝影︰林良明

編輯︰黃卉彤

美術︰顏玉玲