阿倫搞鬼黐癦 薛家燕爆男友睇足兩場

一連兩場《薛家燕愛你無限60年演唱會》前晚圓滿結束，尾場的台上台下依然星光熠熠，嘉賓譚詠麟（阿倫）直言黑白電視年代已經追看家燕姐作品，之後更黐了粒癦在額頭，笑言如有神助，令全場笑爆。

前晚演唱會吸引陳敏之、徐小鳳、潘迪華、劉松仁及鄭丹瑞等圈中人捧場，而阿倫、張智霖（Chilam）、草蜢、羅嘉良、鄭欣宜及「七公主」等則擔任表演嘉賓，Chilam與家燕姐曾在劇集《十月初五的月光》中飾演母子，他前晚以「初哥哥」的造型吹住口哨出場，與家燕姐合唱《分分鐘需要你》，家燕姐自爆前年籌備個唱時，Chilam已經自薦要做嘉賓，她還表示︰「有次去大馬登台，佢請我食一條六千幾蚊嘅魚。」

年底日本旅行充電

家燕姐與阿倫合唱完《愛人女神》後，阿倫表示︰「畀我叫得做阿姐，又屹立喺舞台上嘅人寥寥可數，所以我嗌家燕姐嗌得好順口，我由60年代黑白電視已經追睇你嘅作品，我係你粉絲。」阿倫其後從褲袋中拿粒癦黐在額頭︰「呢粒癦如有神助，並唔係等閒之輩，如果能夠放射激光出來仲厲害。我嗰粒黐上去，你嗰粒應該有根。」

慶功宴上，家燕姐大爆圈外男友坐在第一行，而且睇足兩場，對於陳寶珠稱未見過其男友，家燕姐表示︰「或者遲啲安排食飯。（男友睇完有咩意見？）佢話仔女嗰part感動到喊，之後我哋同啲仔女一齊去日本旅行。」再追問二人婚事，家燕姐坦言︰「都唔會結婚喇，咁嘅年紀結乜婚呀，唔好要人唔安樂，要對人有交代。（清純的愛？）係囉！」

撰文︰倪小珊

編輯︰黃卉彤

美術︰梁政敏