香港土地問題有幾嚴重，相信唔使多講，就連古巨基都睇唔過眼，拍攝名為《維多利亞的故事》的紀錄片，親身落區探訪劏房戶偉林，佢住嘅40呎劏房，月租要$1800、四面無窗只得一張碌架床。一個廁所八伙住戶共用，有時會因為爭廁所用，同其他住戶發生磨擦。而去到冬天仲慘，因為廁所無熱水供應，要自己煲水沖涼。
亦因為房間太狹窄，令偉林寧願喺公園或快餐店打發時間，都唔想返屋企。偉林坦言住了板間房七、八年，乜都化晒：「由初頭唔接受，到唔接受都要接受，希望可以抽到支好籤上公屋」。
偉林又帶基仔參觀劏房環境，睇見如此惡劣的情況，基仔都顯得好感觸：「究竟要喺香港搵一個容身之所，要經歷幾多無奈同失望呢？」而為希望更多人關注呢個問題，基仔最近以新歌《太空艙》，訴說出劏房戶嘅唏噓心聲。基仔咁有心，難怪唔少人都喺網上留言話支持佢，「希望佢唱到特首都聽到啦！」「住劏房真係好慘，基仔要努力幫佢哋呀！」邊個話香港人情紙咁薄架？
(網上截圖)