根據統計，香港人結婚的平均支出高達33萬，呢個價錢仲只係普通貨色，若然你想喺五星級酒店擺酒，隨時酒席都唔止呢個數，不過想過一個夢幻婚禮，又唔係一定要大出血嘅，好似喺圈中出名人緣好嘅鍾欣潼，今個月20號就會喺香港同另一半賴弘國舉行婚宴，話晒一生人一次，阿嬌當然樣樣揀到最好，埋單起碼過百萬，不過好在阿嬌有一班好錫佢嘅兄弟姊妹兼老闆，所有重大開支都有佢哋孭晒，如果扣除埋禮金、禮物等等，阿嬌唔止一個仙都唔使畀，仲應該有賺，大家係咪好羨慕呢？
五星級酒席──楊受成
英皇老闆楊受成一早已經揚言包起阿嬌所有酒席，有老闆埋單，當然唔使慳！佢哋喺The Ritz-Carlton麗思卡爾頓酒店筵開38圍，據資料顯示，酒店最低消費要$23000一圍，以阿嬌身份當然唔會揀最cheap啦，保守啲以三萬蚊一圍計，埋單都要114萬。
結婚蛋糕──容祖兒蔡卓妍
唔好以為祖兒阿Sa慳皮呀！實情呢個結婚蛋糕係由阿嬌親自構思，交由文華酒店炮製，師傅曾經攞過唔少獎，個蛋糕足足有七呎高，到底呢件嘢有乜賣點？就由贊助人阿Sa親自講解：「我從來無買過咁貴嘅蛋糕，要接近6位數，阿嬌話個蛋糕好勁，我完全唔知係乜，淨係知道咁貴，所以要拖祖兒落水。」而由於佢哋荷包已經大出血，所以無力兌現之前送婚紗嘅承諾，不過大家唔使驚，阿嬌已決定改買為租，唔少品牌都想贊助佢。
中港禮餅──謝霆鋒古巨基
由於阿嬌相識滿天下，所以禮餅都要分為中港兩地，內地方面由霆鋒的鋒味負責，佢仲特別在曲奇上印製《易經》字體，夠晒心思呀。至於基仔同古太嘅
Alice Wild Luscious就負責香港部份，由於要整嘅禮餅實在太多，古太仲要暫停工場運作，全力整餅。
襪──鄭希怡
正所謂大有大玩，細嘅一樣可以出力，Yumiko就在禮盒上加送一對襪，寓意甜甜蜜蜜，一雙一對喎。