麥當勞4款阿華田®新地載譽回歸

麥當勞阿華田®新地甜品系列又嚟喇！黛安終於等到有得再食「阿華田（/扭紋）脆脆麥旋風」，今日即刻去買先得！

最近天氣凍冰冰，都無礙想食雪糕嘅慾望！公關姊妹就話，今日起阿華田®新地甜品系列再度重臨麥當勞甜品站，有齊4款比你揀，包括「阿華田（/扭紋）新地筒」、「阿華田（/扭紋）脆脆新地」、「阿華田（/扭紋）脆脆麥旋風」同「阿華田新地窩夫」。

黛安最愛阿華田（/扭紋）脆脆麥旋風，除咗有濃郁嘅阿華田味道，仲喺雪糕面撒上阿華田機智豆，加上阿華田脆脆，真係好味到停唔到口啊！今次會試埋「阿華田新地窩夫」，香脆嘅窩夫配上阿華田新地，再淋上阿華田脆脆同朱古力醬，見到都想食。

想食嘅話，今日11點起就有得供應，不過要留意阿華田新地窩夫只限金鐘海富中心、海灣街、太古城中心、又一城同機場客運大樓McCafé有得賣咋。仲等？快啲去試下啦！