8歲囡囡唔識嗌媽媽 鍾麗淇：我唔可以崩潰

鍾麗淇近日為大女Isabella舉行8歲生日party，慶祝生日表面看似平常不過，但對Isabella來說卻難能可貴，事關她出世不久就證實患上罕見的「4號染色體缺損綜合症」，不單成長較同年齡小朋友遲緩，而且醫生仲話有這個病的小朋友，一般活不過2歲，所以Isabella本身就已經是奇跡，雖然囡囡至今仍未懂說話，鍾麗淇連一句媽媽都未聽過，但她坦言會繼續陪女兒戰勝難關：「一個人遇到問題，你可以逃避，但依家唔係我一個嘅事，我選擇抗爭，我唔可以崩潰！」

無懼歧視 笑容回應

其實「4號染色體缺損綜合症」正確學名是「沃夫－賀許宏氏症」，是因為4號染色體短臂缺失，導致某些身體機能出現缺陷。而鍾麗淇就是因為囡囡在6個月大時發高燒，證實患上呢個病，由於病情影響，Isabella四肢乏力，一直唔識行，不過佢哋從來無放棄，雖然在學行過程中，Isabella不時跌倒，但鍾麗淇不時從旁鼓勵，又不斷陪囡囡接受治療，終於在去年底，Isabella識行喇！ 然而隨之而來嘅竟然是歧視：「因為 Isabella 手腳嘅肌肉無力，行路會搖搖擺擺，經常遇到別人嘅奇怪眼神，有啲家長可能會覺得被冒犯選擇怒目而視，但我會以笑容回應，因為我囡囡真係無敵，佢係我嘅驕傲！大家唔使用可憐嘅心態對待特殊兒童，佢哋比一般人更堅強。」

雖然經過連串治療與努力，但可惜女兒至今仍未能說話，縱然如此，但鍾麗淇依然樂觀面對，還上堂希望了解女兒情況：「我曾經上過課程，導師令我了解特殊小朋友嘅感受，要我收起雙手，不準講嘢，俾我一分鐘去表達啱啱食咗乜，我真係冇可能表達到。佢雖然未識講嘢表達自己，但就識得用手語表達想要同多謝。我都有低潮期，大家睇到我樂觀，都係靠身邊嘅人幫助、扶持，要畀機會人哋幫自己。」而身為瑜伽導師的她又身體力行發放正能量，教導特殊小朋友做瑜伽，希望令更多人明白他們同樣有很大的發展空間，欠的，只是大家給予的機會。

{{hket:inline-image name="ht.jpg"}}{{/hket:inline-image}}

鍾麗淇IG

{{hket:inline-image name="utr.jpg"}}{{/hket:inline-image}}

鍾麗淇IG