【聲明】港生活網站並無進行電話推廣活動

東薈城英倫風賀佳節 PMQ漂浮空間迎聖誕

發佈時間: 2018/12/14

仲有唔夠2星期就到聖誕節,大家諗好去邊未呢?黛安就有幾個推介!聽公關姊妹講,今年PMQ元創方地面廣場會打造成Floating Christmas聖誕漂浮空間,由建築師團隊AaaM設計冬日幻景,兩幢建築物間會有懸浮天幕,日夜感覺截然不同,仲有透明嘅氣球會喺半空漂浮,大家可隨意拋波波,期間會有連場表演,包括由專業編舞師何凱瑩(Desiree)主理嘅互動舞蹈表演,聖誕三個周末會舉行Joy Together放閃市集、GoCup零捨好聖誕市集2.0及Free Your Mind放飛市集,同埋多個釋放想像主題嘅互動體驗,包你影到靚相!

如果鍾意shopping,東薈城名店倉今年聯同Cath Kidston,即日起至明年1月1日,以「滿屋英倫聖誕風」做主題,全場布滿聖誕英國士兵、電話亭、大笨鐘、英式小屋等,好似去咗英國過聖誕咁。商場仲特意請到香港青年步操樂團(藍天軍),以管樂同敲擊樂帶來充滿活力嘅聖誕樂章,同大家「報佳音」。

林村音樂嘉年華 睇環保聖誕樹

除咗商場,黛安知道今年林村都係第一年搞「聖誕音樂嘉年華@林村」,將會喺本月22至26號舉行,仲集合咗全港58間學校嘅112棵環保聖誕樹作品,築起全港最大嘅環保聖誕樹林,聽講每棵聖誕樹至少1至2米高,22號下午6點仲有亮燈儀式呀。

嘉年華仲會一連5日舉行免費音樂會,由20支本地福音樂隊現場演奏聖誕音樂;22號、23號同26號會有聖誕盆菜宴,筵開300席,招待逾3,000人品嘗傳統客家盆菜迎聖誕!

聖誕節有唔少好去處,黛安就覺得PMQ嘅漂浮空間好特別。

撰文: 黛安 消息特靈八卦公關
欄名: 八卦名利場