蔡少芬家暴張晉 「唔好得罪女人」

究竟張晉有幾好打？翻查資料，佢先後奪得中國武術比賽陳式太極拳、太極劍、槍術與劍術的冠軍，仲有八卦掌、醉劍同對練的亞軍，真係等閒之輩都埋唔到佢身，不過近日張生終於遇到對手，就係張太蔡少芬，事關近日張晉喺微博上載短片，只見蔡少芬二話不說就衝埋去家暴張生，起初張晉都應付自如，但點知張太突然狂性打發手腳並用，直頭變咗女版葉問，搞到張晉都招架唔住，不斷中招，兼夾露出痛苦表情，而最可怕係打完之後，張太即時掉頭走人，呢鋪真係無仇報！

不過大家可能奇怪，明明蔡少芬同張晉出名恩愛，點解會突然去到家暴咁激？原來全因張晉衰多口，早幾日張生公開笑老婆：「我看天不怕地不怕就怕蔡少芬說普通話。」寸爆Ada普通話差，結果仲成為新浪微博熱門搜查冠軍，當時Ada已回一句：「看來有人命不久已！」而佢真係講得出做得到，打咗鑊張生勁嘅，難怪張晉都好無奈咁話：「出來混，遲早要還的。事實証明吃飯的時候別亂說話。」睇見張晉咁悲壯，唔少網民都戥佢：「呢個故事教訓大家，千祈唔好得罪女人！」「估唔到蔡少芬咁打得，睇嚟張生有排捱！」

{{hket:inline-image name="6.jpg"}}{{/hket:inline-image}}

張晉微博

{{hket:inline-image name="4.jpg"}}{{/hket:inline-image}}

張晉微博

{{hket:inline-image name="3.jpg"}}{{/hket:inline-image}}

張晉微博