東瀛遊獲頒「旭日雙光章」表揚對日旅遊貢獻

香港人最鍾意去旅行，唔少人更將日本當係「鄉下」，得閒總會去番幾轉，計落唔少本地旅行社都功不可沒！黛安收到風，EGL東瀛遊主席兼執行董事袁文英，上星期四（13號）就獲日本政府頒授「旭日雙光章」，表揚佢對日本旅遊業作出嘅貢獻，成為2018年唯一一位大中華地區嘅獲獎人士！

黛安知道，呢個由日本政府頒授嘅「旭日雙光章」係日本最出名嘅勳章之一，選拔條件非常嚴格，只會頒畀「對國家公共有功勞者中，有引人矚目的顯著功績內容」人士，絕對唔簡單。

公關姊妹同黛安分享，相信袁生今次得獎係同東瀛遊多年來開發唔少日本旅遊路綫有關，好似由2000年代嘅沖繩，到近年嘅鹿兒島、岡山、米子，再到今年新推出嘅德島航綫等，大力推動咗日本二、三綫城市嘅旅遊業發展，亦令香港旅客返「鄉下」更方便。

黛安仲知道，日本近年每逢遭受天災侵襲後，袁生都會以公司及個人名義捐款，支持當地嘅災後重建工作，難怪佢個地位備受肯定，除咗獲頒勳章外，仲先後獲多個日本縣市委任為觀光大使，最近更獲第40個縣市嘅委任，認真犀利。