50歲的馬德鐘早前在網上民選頒獎禮以大熱姿態成為「民間視帝」，當時講到明如果再下一城就更加好，結果他不負眾望憑《 跳躍生命線 》在哥一角榮登TVB視帝。好多人話一個成功男人背後，都有一位賢內助，馬神亦唔例外，馬太張筱蘭的忍耐力更令唔少人嘩嘩聲，事關馬神入行後，幾乎每次拍劇都同拍檔傳緋聞，令婚姻多次爆出危機。幸而浪子回頭金不換，難怪馬神都好感慨咁話「吃過苦，才知道甜」，雖然佢今次得獎可以話實至名歸，不過不少網民都話好佩服馬太咁忍得，令馬神無後顧之憂，才能全心打拼事業。
曾背叛愛情 多得老婆不離不棄
馬德鐘出生於貧困家庭，12歲時已在中學認識了同學張筱蘭。直至去到19歲，馬德鐘重遇張筱蘭，二人頓時墮入愛河，過了幾年好快就拉埋天窗誕下兒子馬在驤，成為馬太後張筱蘭更放棄模特兒工作，專心相夫教子。但另邊廂，高大威猛的馬德鐘就算結咗婚，依然魅力爆燈，更自誇每次與他合作的對手，必定愛上他，事實上與他拍過劇的女藝人，如郭羨妮、葉璇、佘詩曼、胡定欣等都傳過緋聞，有人甚至被拍下一齊返屋企的照片，可見馬神桃花有幾勁，不過最轟動的定非與陳浩民一同借醉爆出「陳嘉桓抽水事件」，有指更搞到馬太要遠走歐洲冷靜，驚爆婚變風波。
幸而最後馬太還是原諒老公，最終令馬神浪子回頭：「我諗我再搵唔到，一個比佢更清楚我、了解我脾性嘅人。」而為挽救老公形象，馬太由小女人轉身一變成為幕後軍師幫手拆彈，不斷於微博晒恩愛，上載溫馨相；又幫手安排馬神參與公益活動，如港安醫院「愛心大使」、仁愛堂「仁愛大使」及愛護動物協會大使等等；仲做埋跟得太太，時時陪伴在馬神身邊。馬神之所以能洗底成功，收復失地，一躍成為情深專一兼英勇威猛的在哥，馬太絕對功不可沒，難怪馬神今次封帝亦十分感激太太：「多謝我太太，做一個藝人嘅太太唔容易，你照顧得我同我屋企人好好，好多謝你！」
拍劇決心零緋聞 變好老公常晒恩愛
而除了工作，如今馬神一得閒就會陪老婆，不時帶她周遊列國，形影不離，早前二人就拋低仔仔去西藏旅遊過二人世界。馬神現在還常常把老婆掛在口邊，悉心營造長情顧家好男人形象，恩愛得羨煞旁人。咁都未算，之前馬神就被發現變身柴可夫，於車上呆等個半鐘，等做spa的馬太做車就返屋企，24小時oncall任由老婆差遣。從昔日的無腳雀仔變成今日的愛妻號，唔不少網民都為馬太折服：「換轉正常人可能一早頂唔順，好佩服馬太咁忍得」、「馬太係抵讚，不過馬神肯修心養性，都好難得，希望佢哋白頭到老」