呢排《愛回家之開心速遞》講到滕麗名幫女城安（周嘉洛飾演）用催眠術消除幻覺，網民唔止大讚劇情搞笑，又話估唔到42歲嘅滕麗名keep得咁好，索過唔少後生女呀！睇見阿滕如今唔止事業得意，仲有個好錫自己嘅有米老公朱建崑，唔少網民都戥佢好彩，事關當年佢竟然戀上負心男魏駿傑，更已經去到談婚論嫁地步，點知最後魏生移情別戀，仲大鬧阿滕係賤人。結果時間證明一切，魏駿傑嘅婚姻唔止多次亮紅燈，如今嘅佢仲竟然嚴重走樣，從昔日肌內猛男變成大肥佬，搞到唔少網民衝出嚟贈興：「可能係報應！」
▼依家男嘅就愈來愈肥
▼女嘅就愈來愈索
記得當年魏駿傑靚仔大隻，迷倒唔少女生，憑《陀槍師姐》飾演程峰一角成功爆紅，更與同劇的滕麗名譜出愛歌，期間兩人不時傳出婚訊，點知拍拖9年後，魏駿傑突然戀上年僅19歲嘅張利華，狠飛阿滕，仲同人結埋婚、生埋女，自此被冠上負心男罪名，而其社交網站更不時受到網民攻擊，面對是非浪接浪，魏駿傑竟然連阿滕都鬧埋：「這種賤人趁早撇低，否則後悔一輩子！」結果兩邊開火足足4個鐘，最後魏駿傑竟然將風波歸咎成黑客入侵。
其後阿滕於2013年與朱建崑結婚組織幸福家庭，點知魏駿傑接受深圳衛視節目《男左女右》訪問時竟然話：「我同佢拍咗拖9年，我就唔娶佢唔得咩？」隨時惹來網民再次鬧爆。阿滕已經做咗人未婚妻所以不願受屈，打破沉默發出2條微博，反駁話魏駿傑婚後曾一次又一次向自己發短訊要求復合，啲短訊仲keep住冇刪除到。魏駿傑之後解釋分手初期是有傳短訊，但後來已經冇咁做；但阿滕就踢爆魏駿傑，話明明keep住有傳短訊騷擾佢。由於阿滕麗名有短訊喺手，魏駿傑唔敢再講啲乜，唯有死死氣發微博話唔回答關於以前嘅任何事。
不過時間可證明一切，如今阿滕成為幸福闊太，相反魏駿傑就多次傳出因為與老婆聚少離多，爆出婚變疑雲，雖然魏生每次都衝出嚟澄清無咁嘅事，但依然傳聞停不了，難怪唔少網民都為阿滕無成為魏太感到開心呀！