貴為亞洲男神，仲要係90年代同00年代叱吒日本演藝界嘅天王嘅木村拓哉，最近亦敵唔過人仔嘅魔力，開設微博賺人仔，拉近同內地粉絲嘅距離。唔止內地粉絲為之瘋狂，就連羅志祥都即刻要搭訕：「好害羞呀！希望您會看見我。」，點知就惹嚟女友周揚青取笑：「大哥要寫日文！不然你覺得你老公能看得懂？」可見呢位萬人迷嘅魅力有幾勁！
而木村開微博短短兩日，粉絲人數已衝破36萬，極速得到新浪名人認證。為答謝大家支持，木村上載咗條片同大家打招呼，全程用中文自我介紹：「大家晚上好，我是木村拓哉，我開通了微博，請大家關注我，謝謝。」連個caption都係中文，仲識用標點符號：「大家好！我是木村拓哉。」，好有心！之後木村又再發文，先上載兩幅飲咖啡同上飛機嘅相，話俾大家聽佢要返日本。去到最新一張終於show個型樣出嚟，預祝大家聖誕快樂，引嚟大批粉絲留言同轉發。順帶一提，原來木村賺咁多錢，佢都只係用緊iPhone 6s Plus！真係估佢唔到。
雖然木村好受歡迎，但你知網民出名要求高，有網民就搵返木村之前出活動嘅相，話46歲嘅佢個樣殘咗好多，仲話加上佢咁嘅髮型，望落竟然激似行政會議成員兼資深大律師湯家驊。仲有網民拎咗當時一齊拍過雜誌執面嘅梁朝偉同木村做比較，話人哋都已經56歲，大木村足足10歲，反而偉仔依家望落仲型過木村，兩個人好似有唔同速度嘅時鐘咁。但其實木村都46歲，咁嘅年紀望落多皺紋都好正常，加上佢鐘意滑浪嗰陣唔搽防曬用品，廢事化學成分對海洋造成污染，結果皮膚老化得更快。所以亦有網民力撐木村，話佢只係髮型出事：「set返好個頭就無事」、「佢個面型都長，仲要gel高...都係長髮型棍啲」，估唔到木村都有carry唔到嘅髮型呀吓。
▼呢張相夠晒經典
▼唔set嗰個髮型，正常放頭髮落嚟，你睇又變返男神喇！