昨晚叱咤樂壇流行榜頒獎禮容祖兒終於憑《心之科學》奪得「至尊歌曲大獎」。得獎固之然開心，但容祖兒一向人紅是非多，當中最大鑊不得不數2007年建議散播電腦病毒來對付英皇合作公司MP3、2009年咀藐藐歌迷事件、2015年新鞋踩飛機窗自拍等。除此之外言行大膽的容祖兒入行廿年以來多多金句，包括「非洲小朋友食樹皮好似食蔗咁好得意！」、「你哋唔係噓我呀嗎？」，辣㷫不少網民。今次叱咤頒獎禮又再惹來不少網民熱議，都不知道是她真是有問題，還是網民太敏感。
1. 首位大滿貫食詐糊
森美在頒「至尊歌曲大獎」予容祖兒之前，表示這位歌手攞過好多專業大獎，包括多個女歌手金獎，只差至尊歌曲大獎就完滿：「至尊歌啫係全年播放率最高嘅歌！」，其後有媒體更指祖兒成為首位叱咤大滿貫的女歌手。但原來翻查資料，祖兒雖然拿過11次女歌手金獎、2次我最喜愛女歌手、一次至尊唱片大獎，與及今次首奪至尊歌曲大獎，不過可惜佢係未拎過我最喜愛歌曲。相反昨晚拎埋女歌手金獎嘅謝安琪，才是首位囊括叱咤所有個人和歌曲大獎的女歌手，擁有大滿貫成就。
2. 造馬疑雲
咁都未算，最尷尬是有網民聲稱根據計數據，祖兒奪獎的《心之科學》有造馬之嫌，：「唔好話歌，歌名都未聽過，佢只係播過194次，《未來見》（RubberBand）就有成227次；仲有張敬軒嘅《天才兒童》仲受歡迎啦！好唔公道，又係鬥後台嘅假公正遊戲！」、「祖兒唱過好多好好聽嘅歌，但係呢隻唔係佢最好聽嘅歌，亦唔係今年最hit嘅歌，之前啲歌更值得拎啦」。不過亦有網民力撐祖兒：「叱咤講到明有專業會計師做統計，如果有人話造馬請拎出實質證據。」對於網民非議，祖兒得獎時信心十足，心情沒有受影響：「我出道喺上一個世紀，係1999年新人，嚟到2019年今日終於得到叱咤頒畀我嘅song of year。月光有人撈起，有人瞧不起，所以你仍有胸襟，永不洩氣，咁就可以。」
3. 著紅衫走錯場？
除了獎項惹爭議，就連衣著都出事。由於當晚大會設有悼念Ellen盧凱彤環節，有唔少歌手都「巧合」地以素色登場，相反祖兒卻以由頭到尾大紅色，惹來部份網民不滿：「為搶鏡突登著鮮紅好唔專重」、「後生個班又著鮮色就話唔識規矩啫。作為一姐又大前輩唔識大體？坐前兩排嘅歌手都冇人著到咁紅啦」不過亦有粉絲力撐偶像與Ellen友情深厚，認為有人有心挑撥離開：「之前Joey演唱會有搵Ellen幫手，仲請佢專登改編自己首歌。Ellen過身嗰陣，佢喺ig post咗咁多年以嚟佢哋加二汶嘅合照，睇得出佢同at17一直都好熟」、「天后話條裙係Wyman幫佢揀，唔關佢事㗎，咁我又覺得如果係為咗Ellen，Wyman唔會咁伏佢嘅」
睇完以上例子，祖兒果然好惹是非，點都會俾網民話，希望新一年她順順利利，重新獲得民心吧。