馬國明逛車行當娛樂節目

劇集《降魔的》前年推出時收視口碑雙贏，事隔兩年，再由馬國明與黃智雯孭飛開拍《降魔的2.0》（暫名）。昨日造型記者會，馬明表示角色延續自上一輯，且還有許多情節可以交代。

馬明和智雯在《降魔的》的關係未有開花結果，那新一輯會否帶來喜訊？馬明表示︰「應該會啩，不過今輯安排多咗個Zoie（譚凱琪）畀我，估唔到的士佬咁多靚女埋身，以後撈唔到演員就去揸的士載靚女。」黃智雯則透露上一輯劇情比較沉重，今輯會較多喜劇感，她帶笑解釋︰「因為我多咗個拍檔C君，佢有個癖好鍾意偷睇人哋裙底，係鹹濕鬼，而且我在今輯會多咗超能力，會幫助馬國明降魔。」

另外，提到馬明日前被發現到車行睇車，問到是否打算買新座駕？他笑言︰「我成日睇車，唔換車都睇，經過就睇，當係一個娛樂節目。（買車獎勵自己得獎？）我想買架大車畀屋企人，令佢哋坐得舒服啲，依家架車坐晒全家人真係有少少逼，不過我唔急住買，覺得性價比高先會行動，依家部車只係揸咗兩年，望下先啦。」

黃智雯同男友財政獨立

至於雙料視后黃智雯是否買了禮物獎勵自己？她表示想做業主︰「2019年畀個目標自己，想買樓，單位唔使好大，上咗車先算，諗住用嚟投資。（結婚用？）其實想買樓畀家人，入行十年儲到第一桶金，希望今年可以做業主。（叫男友送畀你？）我鍾意財政獨立，自己鍾意嘅嘢自己買，咁會珍惜啲。」

撰文︰Pauline

編輯︰黃卉彤

美術︰顏玉玲