大家仲記唔記韓君婷？以前佢係始祖級女神之一，因為佢個混血兒甜美靚樣好吃香，曾經被邀請喺《Yes!》雜誌（現已停刊）嘅「城市驚喜」環節中亮相，之後仲喺1997年亞洲小姐奪冠，當時嘅佢吸納咗唔少宅男粉絲。點知自從韓君婷轉行做咗醫學美容之後，做埋公司白老鼠，整容整到個樣唔同晒，好多網民都嚇親，話好似第二個人咁，笑佢削骨還父！
▼記憶中嘅韓君婷係個靚女嚟，睇吓廿歲嘅佢幾卜卜脆！
唔做藝人做白老鼠 整容整到唔認得
話說韓君婷入行之後曾經肥到達到128磅，當年以泳衣造型亮相《獎門人》，點知俾媒傳封做「籮霸」，其後韓君婷難忍被笑，做纖體公司代言人。雖然最後成功減磅，但就患上厭食同抑鬱症，身體得返棚骨冇肥過。不過瘦咗之後都冇咩突破點，演藝事業浮浮沉沉，結果喺2010年韓君婷結束同TVB 9年合約，淡出娛樂圈並移居新加坡，好少喺螢幕前出現。直至4年前韓君婷喺浴室意外仆崩鼻先回流香港，佢嗰陣自稱毀容要急於做手術，但整吓整吓個鼻塌到救唔返，連其他部位都唔同晒，個樣係咁變，好似變魔術咁。
原來近排韓君婷已經轉咗行做美容工作，喺德國大藥廠嘅香港部門擔任Practice Development Executive，主力宣傳醫學美容同相關儀器，做得有聲有色。為咗向公司證明自己有影響力，竟然大膽到自薦做白老鼠，承認有注射醫學美容產品改善臉紋：「我會慢慢退出娛樂圈，開始研究醫學美容，想以此發展事業，會做白老鼠。依家效果幾好，打咗幾次，大家見我都唔覺，不過我有同醫生講要Keep番少少眼紋先有真實感，唔係會太膠太假。」雖然韓君婷咁講，但似乎唔少網民都睇得出佢整咗容，甚至話佢整容失敗，韓君婷就回應：「我嘅鼻至今做咗一次半手術，每次做手術都會令創傷加大，之前又因為環境而發炎，所以暫時唔會考慮再做手術。」
渴望搵埋圈中人一齊整
雖然已經淡出娛樂圈，不過韓君婷表示收到唔少圈中同圈外朋友話整容失敗，所以覺得有好嘢都想益吓大家：「其實市面上有更好嘅產品，大家如有需要可以搵我，自己就唔太方便逐個敲門，大家可以放心我個人好口密，唔會開名。例如司棋姐都得，再加微調執一執會好正！男藝人好似曾志偉咁再拉緊小小鬆馳嘅面皮就可以俾女圍，哈，但我幫唔到佢增高」，估韓君婷講嘢又幾幽默喎，唔知大家睇完想唔想搵佢呢？