港初創推旅行App 遊歷歐洲賞藝術

就到農曆新年，黛安身邊唔少鍾意藝術文化嘅姊妹，都好想趁呢段時間去歐遊，體驗西方藝術氛圍。黛安相信由科技初創企業《賞遊》提供嘅應用程式可以幫到手，事關呢個App可為自由行旅客提供歐洲國家嘅藝術文化景點，包括英國、法國、荷蘭、比利時、西班牙、意大利6國超過1,000間藝術商舖景點，包括博物館、藝術畫廊、當地家族傳承店等，畀遊客遊覽同消費。

《賞遊》於2017年成立，佢哋設計嘅App，可以等旅客到達外地時，根據所在嘅地理位置，提供附近藝術景點資料，旅客仲可以喺《賞遊》嘅合作商戶購物或參觀，享折扣優惠或免費贈品。

為令旅客更了解景點背後嘅故事同資訊，《賞遊》更提供繙譯服務，打破語言阻礙，深入認識當地藝術文化。創辦人及行政總裁張得欣話，雖然而家只限簡體字繙譯，但遲啲會有繁體字版本，「希望平台介紹世界各地嘅歷史文化同家族故事，擴闊中國年輕自由行旅客嘅視野」。即使用戶唔喺當地，平台都會按用戶喜好，推薦景點。