馬會保健資助計劃 贊助長者接受中醫檢查

新一年，黛安最大嘅願望係身體健康，要照顧身體，大家平時可能有接受西醫身體檢查，但原來中醫都有得「Body Check」，老友記依家仲有資助呀！黛安聽馬會嘅公關姊妹講，「香港浸會大學-賽馬會中醫疾病預防與健康管理中心」即日起推出「長者保健資助計劃」，資助65歲或以上嘅老友記半價接受中醫健康評估，領取緊綜援嘅長者更可獲全費資助，演藝界老友記胡楓（修哥）同羅蘭噚日就出席計劃嘅啟動禮，大讚診所靚又收費相宜。

話明中醫評估，當然唔少得四診「望聞問切」，除此之外，黛安仲知道中醫健康顧問會按長者嘅身體狀況同體質，為老友記度身訂造養生計劃，例如針灸、氣功、太極或食療等，從而增強體魄。合資格嘅參加者半年內可享有6次資助，金卡全額資助每次最多550元，銀卡半額每次最多275元，可用於諮詢費、檢測費及調理費，而醫師建議嘅藥包、涼茶同藥材就要自費啦。老友記可填寫表格、親身或郵寄報名，全年接受申請，詳情可上賽馬會「擁抱健康」網站了解下。