為陳校長免費補習天地籌款 Pacific Coffee彩繪杯大募集 發揮創意兼行善

由陳葒校長創辦嘅「陳校長免費補習天地」，專門幫有經濟困難嘅弱勢學童補習，黛安知道Pacific Coffee「彩繪杯大募集」今年會幫佢哋籌款，以「未來香港」為題，發揮大家嘅想像畫出個未來！

「彩繪杯大募集」已正式啟動，邀請一班中、小學生參加，即日起至下個月21號，去到任何香港Pacific Coffee分店，向職員索取標準裝（Tall）紙杯或大杯裝（Grande）紙杯，或喺所屬學校／機構向大會索取紙杯，就可以發揮創意，畫出大家心中嘅「未來香港」，然後下個月21號前交返去任何香港Pacific Coffee分店、所屬學校或機構就可以啦。

聽公關姊妹講，今年特別邀請到Pacific Coffee Company Limited香港及海外首席執行官Mr. Jonathan Somerville、香港貿發局創作部副主管錢慧珊、陳葒校長、藝術家b.wing、同多媒體藝術家葉蘊儀做評判，選出小學組、中學組冠、亞、季軍，同最佳創意獎得獎者。評審原則就係要切合主題、色彩使用、技巧、綜合美觀。

小學組及中學組冠、亞、季軍除咗有1,000元至3,000元現金獎外，得獎作品未來仲會用喺Pacific Coffee嘅標準裝（Tall）及大杯裝（Grande）限量版彩繪紙杯上，人人拎住屬於你嘅設計，真係好威水。而喺7月期間，每售出1杯限量版蒸餾咖啡，Pacific Coffee就會捐出1元畀「陳校長免費補習天地」。8月亦都會喺全綫Pacific Coffee放捐款箱籌募善款。

比賽詳情請可以參閱http://www.pacificcoffee.com/chi/news/Cupart.html。