【聲明】港生活網站並無進行電話推廣活動

藝發局×馬會推戶外展覽 思考「家」的意義

發佈時間: 2019/01/11

黛安最近經過尖沙咀文化中心附近,見到好多藝術裝置,非常特別。聽公關姊妹講,呢個名為《家?》嘅展覽,係由多媒體藝術家同作曲家梁基爵GayBird創作。

公關姊妹仲話,活動係由香港藝術發展局同「賽馬會藝壇新勢力」合作舉辦嘅首個戶外多媒體展覽,會去到3個地點免費開放畀公眾參觀,包括中環碼頭、尖沙咀香港文化中心同銅鑼灣鬧市,等大家一齊投入互動裝置,思索「家」嘅意義。

原來《家?》係梁基爵喺澳亞藝術節展出嘅大型戶外展覽延續篇,由草地來到城市,亦多咗一個「?」。而每個展覽地點都會以唔同形式展示,壓迫、密集、整齊等唔同嘅空間感,引領大家聯想切身處境。

適逢今年係豬年,姊妹話中環展覽會同時展出一隻高達1.8米嘅巨豬藝術裝置,仲會向大家送出《家?》展覽嘅小豬模型。只要喺fb或者ig公開上載在展覽場地同小豬模型嘅合照,hashtag#JCNewArtsPower、#HomebyGayBird2019,並持有梁基爵喺今日同聽日舉行嘅音樂旅程《順時針逆行》票尾正本,30名獲選者就可以獲得喇,截止日期係1月23號。手快有手慢無啊!

撰文: 黛安 消息特靈八卦公關
欄名: 八卦名利場