王祖藍與李亞男上個月榮升父母，當時他們上載囡囡Gabrielle超聲波與手仔相報喜，但未有公開囡囡樣貌。前晚祖藍趁39歲生日終於公開囡囡正面樣，亞男冧爆：「I have two babies now ! 老公你喜歡今年的生日禮物嗎？」，而祖藍都好識做：「你和Gabrielle都是我最好的禮物。」，一家三口相當溫馨又sweet。能夠得到2份最佳禮物，廿四孝爸爸兼老公祖藍一直以來付出不少。雖然由拍拖開始他們的戀情已不被看好，外父外母甚至唔俾嫁，不過他依然堅持要與亞男組織家庭。最後終於感動大家，將童話變現實，成為最幸福的男人。
長短戀不被睇好分手3年 祖藍狂搵錢寫情歌落翻撻
14年前，李亞男與王祖藍於兒童節目《DaDaDeDe精靈樂園》做主持撻著，不過這對戀情維持3個月就因為身高差距而告吹。在加拿大出世的亞男是2004年溫哥華華裔小姐與2005年國際華裔小姐競選大熱冠軍，從小五官標緻加身高175cm好身材，是現實童話中公主；相反祖男身高162cm，樣貌平平。亞男坦承當時還是喜歡高大型男，而且外界目光太大壓力：「覺得佢細細粒幾得意，我鍾意嘅明星都係王力宏、黎明嗰啲，我都怕對祖藍嘅係感動唔係感情，最後傷害咗佢，所以大家喺電話分手講到喊⋯⋯真心如果唔使顧及人眼光，我哋應該會更早一齊。」，連祖藍後來也承認覺得自己高攀不起選美冠軍所以放棄。
分手後祖藍知道亞男是虔誠基督徒，性格單純，開始努力工作增值自己想追返女神。轉數快、識搞笑，祖藍愈來愈紅，先在《同事三分親》樓華一角廣受討論，再成為《鐵甲無敵獎門人》的獎老及擔任香港小姐競選司儀，獲得飛躍進步男藝員獎項，人氣有升無跌，二人距離拉近。2009年祖藍第二度追求亞男，為表誠意竟不眠不休趕工寫情信加情歌《跌落凡間的天使》打動芳心，亞男終被感動：「我嗰陣時以為世界好大，喺身邊搵吓有冇其他人發展，不過慢慢都係發現冇人比祖藍更適合我。」
外父外母嫌矮拒嫁女 豪擲500萬禮金娶亞男
不過搞掂亞男，仲有一關未過，亞男前度是律師，所以外母嫌棄祖藍又霉又矮，難以接受。祖藍憶述：「李亞男拍拖對佢屋企人嚟講好大件事，佢媽咪好緊張，乜都管束住。亞男從小喺溫室長大，微波爐唔識用，罐頭唔識開，佢媽咪真係好照顧佢。佢屋企人覺得亞男拍拖應該係王力宏，點知你俾細龜佢！唔係翅同碗仔翅嘅分別，係翅同豉油嘅分別。我嗰時係兒童節目主持，冇人識，身高又……而佢，華姐喎，又高又靚，佢哋覺得係咪要搵個好啲呢？」結果2014年2月首次提出婚事被拒絕，又擔心又心急的祖藍於是親身飛去加拿大再次提親，答應會搞香港、上海、加拿大3地婚禮外，又傳出以500萬做禮金，證明自己俾到安全感亞男，最終用誠意打動外父外母。
不僅如此，祖藍豪在迪士尼豪擺60幾圍酒席，每圍接近2萬，誓要打造童話式婚禮，有傳單單香港擺酒已洗200萬。祖藍再豪擲1400萬買大埔雅景花園獨立屋，加上裝修費1000萬左右，作為婚後愛巢。過了一段時間，他又再豪擲1億1000多萬元，購入大埔逸瓏灣頂層複式連天台單位作，業權全歸老婆名下，認真是愛妻號。
婚後為亞男暫停事業
婚後，祖藍繼續在大陸發展，不斷參加綜藝節目，如《奔跑吧兄弟》、《王牌對王牌》、《跨界歌王》等賺錢俾老婆，2015年甚至聯同邵氏兄弟電影有限公司合作成立手工藝創作。兩公婆聚少離多，獨守空房的亞男一度傳出患上抑鬱症，情緒不穩，常常在家大喊，要與好姊妹苟芸慧傾心事，甚至嚴重到要見輔導，試過驚恐症爆發要兩度入院，當時祖藍好擔心：「佢心跳得好嚴重，以為心臟病發，成個人抽筋郁唔到，好似閃電咁，呼吸困難。我以為佢會死，我好驚！」。自從見到亞男病發，祖藍非常內疚，不惜狂推job放棄年賺過億的大陸市場，提早規半退休生活，留更多時間陪老婆：「佢要我陪住㗎，之後我就無再接電視劇同電影啦！」