早前ViuTV套《人住公屋我住公屋》引嚟好大回響，事關節目好貼地咁去咗公屋政策做得好完善嘅國家，道出香港樓價高企同狹窄居住環境嘅問題。當中主持黃秋生句句精警，好燥咁話得香港人會起納米樓，俾好多網民讚係民主男神。不過黃秋生除咗敢言，原來佢真係男神嚟㗎！有網民就翻出佢得廿歲嗰陣嘅舊照，發現佢後生靚仔到痴線，成個「混血男神」咁，比得上梁朝偉添。除咗佢之外，其實上世紀有唔少男藝人年輕時都好型，曾經係風度翩翩嘅公子哥兒，當年仲要唔興男人化妝，證明係真材實料、無添加！講多無謂，有圖有真相！
黃秋生
黃秋生係個中英混血兒，英文名叫Anthony William Perry，爸爸係港英政府高官Frederick William Perry，真係英國人；至於媽媽黃尊儀就係華人。佢比較似爸爸，所以輪廓好深，後生嗰陣望落成個鬼仔咁，係人愈大先有返啲中國人感覺。
許紹雄
Benz雄後生個樣幾老成，所以早年時期好少做主角，反而都做咗幾多奸角。以為佢同靚仔掛勾唔到，點知佢竟然同飾演黑豹嘅演員Chadwick Boseman撞樣。依家Benz雄個樣愈來愈和善，開始做好爸爸角色。
胡楓
修哥以前幾潮，依家oppa梳緊嗰個髮型，原來修哥後生已經有先見之明一早剪咗。仲有佢喺60年代後期同蕭芳芳合作拍咗唔少歌舞片，舞藝精湛，有舞王修之稱號，幾勁啊！
謝賢
四哥有型就係人都知，無論以前定依家依然咁有型、咁有活力，所以俾人叫做「不老男神」，仲先後同到甄珍同狄波拉2位女神結婚。最勁嘅係前幾年年屆8字頭嘅四哥依然咁有魅力，成功媾到細過佢49年嘅Coco一齊，認真巴閉。
喬宏
已經離開咗我哋嘅喬宏喺60年代係個獨當一面嘅影星，因為外表靚仔加上身形健碩，所以被稱為「雄獅」同「鐵公子」，仲有啲似Clint Eastwood，連網民都話唔怪得佢喺《家有喜事》話自己有對溝死女嘅眼。就算晚年嗰陣，喬宏叔都係有型有款，加上英文好，識揸飛機，啲少女見到都會流晒口水。
曾江
由粵語片年代到依家曾江都係當紅影星，佢個樣好有氣勢同威嚴，所以多數會演梟雄。後生嘅佢眼大大，啲網民竟然話有幾分似江若琳。
姜大衛
姜大衛係邵氏電影輝煌時期嘅頭號小生，佢主演嘅武俠片對香港功夫影壇產生巨大影響，其中《報仇》、《新獨臂刀》就成為邵氏公司的名作喇。
狄龍
狄龍與李小龍、梁小龍、成龍並稱香港「四小龍」，自小習詠春拳，60年代開始演藝生涯，喺邵氏武俠盛行時代，佢同姜大衛平分秋色，80年代中期，佢喺《英雄本色》中扮演大哥宋子豪獲得台灣金馬獎影帝。
李家鼎
鼎爺18歲開始拜師習武，習過太極拳、詠春拳，20歲就擔當龍虎武師，所以啲肌肉好結實，有6舊腹肌，仲有啲似張家輝添！
劉松仁
後生時仁哥嘅眼神帶點憂鬱，《歲月風雲》做華文翰嗰陣最型，佢老婆曾經做過空姐，兩個帥哥美女好襯㗎。
黃日華
網民話佢後生好似《幽游白書》真人版浦飯幽助，有啲似日本人，80年代佢同湯鎮業、苗僑偉、劉德華和梁朝偉並稱「無綫五虎將」，證明佢有一定嘅魅力。
歐陽震華
有咁多頭髮嘅Bobby見過未？雖然佢同靚仔有少少唔關事，不過佢唔見左肚腩，成個櫻木花道咁，仲要戴晒鐵鏈，都幾搞笑。