男友讚演技進步 李佳芯︰攞獎都無讚過我

李佳芯（Ali）上月憑《BB來了》首奪視后，演技獲肯定，她的男友陳炳銓雖是演戲導師，但原來從未當面讚過女友演技。日前陳炳銓受訪時，毫不避嫌讚女友演戲有進步，令Ali驚喜又開心。

李佳芯昨日到紅磡出席商場的新年活動，即席獻唱鄭秀文歌曲《千年如一日》。Ali自言已盡了力獻唱，又表示自己向來怕醜，只會在家洗澡的時候才會練歌︰「細個練琴，我都會戴headphone匿埋練。有時我真係懷疑自己入錯行，由細到大都好怕面對人群，到依家有時對住陌生人都會面紅。我細個好靜、好自閉，同學話我好似鬼，唔出聲兼無體溫，直頭feel唔到我存在！」內向的Ali笑稱入娛樂圈是緣份︰「第一次面對鏡頭，真係好驚又好緊張，惟有用死力睜大對眼。當初只係做模特兒同主持，唔使面對好多人，直到去TVB拍劇就開始唔知醜。」

無帶異性回家拜年

提到男友陳炳銓公開稱讚她演技進步，Ali聞言驚訝又甜笑︰「好開心呀！因為佢係專業，佢係行內人，又係導師級，亦係我嘅前輩。平時佢都無讚過我，就算攞獎都無讚，等陣打畀佢問下先。」

提到農曆新年將至，會否去陳家（男友家）拜年？她笑說︰「我媽咪都係姓陳喎！咁多年嚟我同佢都未去過對方屋企拜年，不過兩家人都有外出一齊食飯，我無帶過異性返屋企拜年。」

採訪︰Pauline

攝影︰林良明

編輯︰李潔盈

美術︰陳超雄