呢排潮流興「10years challenge」，結果成堆90後女藝人擺返10年前嘅相同依家做對比，想證明自己冇變過咁喎。之但係好似麥明詩、馮盈盈咁，10年前佢哋仲係10幾歲，講真個樣可以變得幾多，睇完真係得啖笑！相反有班凍齡超過20年嘅女藝人就堅厲害，喺佢哋臉上面完全睇唔到歲月嘅痕跡，保養得宜，到依家個樣仲停留喺廿歲少女嗰陣咁，呢啲先值得我哋讚嘆㗎嘛。以下呢10位女藝人，大家聽到佢哋嘅真實年齡實隨時會嚇一跳，大叫佩服。
吳婉芳
吳婉芳堪稱絕頂凍齡女神，生於1967年已經年屆51歲嘅佢望落仲好似廿幾歲嘅女仔咁，凍齡30年，一舉手投足都仲好青春，非常屈機。Keep得咁好，因為底子都好好，1986年參加香港小姐競選，佢就一連奪得亞軍、最上鏡小姐同才華小姐3個獎項，證明佢美貌係獲得大家肯定。最重要係佢退出演藝圈約25年，一早遠離辛苦勞碌嘅拍劇生活，專心做少奶奶養尊處優，唔靚就假，難怪每次出入馬場都成為傳媒同市民嘅焦點。
袁詠儀
叫得靚靚就梗係正啦，1971年出世嘅佢已經47歲，不過同佢老公張智霖一樣兩個都唔識老。近日佢好有自信咁喺微博post咗張淡妝相，有網民為佢加咗美顏濾鏡，磨皮又大眼，而靚靚睇完冇buy不特止仲好反感。梗係啦，靚靚係1990年度香港小姐冠軍同最上鏡小姐，出道咁多年一直保養得宜，邊使呢啲嘢？同埋佢冇熬夜習慣，早睡早起，自己少啲皺紋！
(TVB電視截圖)
郭藹明
時間真係過得好快，原來1967年出世嘅郭藹明已年屆51歲，但佢仲皮光肉滑，厲害。喺24歲嗰陣，佢已經贏得1991年度香港小姐競選冠軍、國際親善小姐同最佳談吐幽默獎；其後參選1992年國際華裔小姐競選又奪得亞軍同最佳民族扮相獎，係公認美女。同劉青雲拍拖時，甚至被人叫做「美女與野獸」組合嚟嘲笑佢哋嘅外表差異。所以話，直至依家邊個會估到佢51歲呢？
佘詩曼
1975年出世43歲嘅阿佘係1997年香港小姐季軍，直到依家過咗咁多年，佢連妝都可以唔化，就咁自拍放上網，你話幾勁。近日佢喺北京被網紅老闆娘要求合照，點知老闆娘個美顏相機P得太勁，阿佘當場皮笑肉不笑表達自己內心有幾無奈。咁又係呀，仲keep得咁好，點解要變做蛇精女呢，嚇死人咩！
(TVB電視截圖)
(TVB電視截圖)
(TVB電視截圖)
黎姿
雖然黎姿1971年出世已經47歲，不過叫做「愛美神」，身於演藝世家嘅佢名不虛傳，由細到大都咁靚。最近佢同細佬黎嬰間醫學美容集團上埋市，豬籠入水，公司員工仲叫佢做「最靚CEO」！睇怕都係呢位老闆娘做生招牌吸引咁多客人啦。
溫碧霞
1966年出世，52歲嘅溫碧霞係唯一一個仲可以carry到露肩衫嘅女人，青春二字喺佢身上依然適用。中學未畢業，溫碧霞已經被星探發掘拍戲，仲有喺《封神榜》飾演妲己，又奸又靚嗰個樣深入民心。直至依家就算年過半百，溫碧霞都仲會泳衣上陣，甚至有唔少人覺得佢好正，大讚老齡嫩肌，就知佢個樣幾咁逆成長。
(TVB電視截圖)
張可頤
港姐出身嘅張可頤曾經係「千禧年代無綫五大當家花旦」，年紀輕輕已經喺街度被發掘參演電影，因為樣貌清俗，曾被梅艷芳稱為「影壇新星」。生於1969嘅佢依家49歲，無論是個樣定身材都仲係一個又靚又性感嘅熟女嚟。
(TVB電視截圖)
陳煒
每次煒哥一盛裝出席TVB節目巡禮、台慶、頒獎禮，都會引嚟網民熱烈討論，因為1973會出世經已45歲嘅佢外表仲keep得好好，而且身材玲瓏浮突，連少女都好羨慕佢！講返24年前，煒哥就已經以22歲之齡，大熱姿勢下贏到亞洲小姐冠軍，及後隨即被亞視力捧做一姐，直到依家身為一個中女仍然魅力四射。
宣萱
48歲嘅宣萱喺1970年出世，自從同外籍男朋友分手之後，佢就下決心過返健康積極嘅生活同埋減肥，希望望落年輕啲。而佢亦都成功咗，個樣同20幾年前冇咩分別。
(TVB電視截圖)
蒙嘉慧
23歲嘅蒙嘉慧原本同郭富城合作拍廣告，點知正正因為佢一頭烏黑長髮同清秀可人嘅樣貌得到杜琪峯賞識，所以佢先有機會晉身娛樂圈。1973年出世嘅佢年屆45歲，不過喺皮膚上完全睇唔出真實年齡，究竟蒙嘉慧嘅凍齡秘密係咩呢？
(TVB電視截圖)