曾叫錯女友做麥美恩 陸浩明先買樓後結婚

陸浩明（6號）與模特兒女友陳詩欣（Ayan）拍拖多年，感情穩定，昨日兩人以情侶檔現身活動，6號曾表示試過將女友叫錯做Mayanne（麥美恩）而激嬲對方，昨日Ayan「還擊」否認非君不嫁，兩人公然耍花槍。

陸浩明和陳詩欣昨日穿上粉紅色情侶裝，到銅鑼灣出席活動，6號更向女友送上一盤自己親自插的鮮花小盆栽，大曬恩愛。6號日前在《#後生仔傾吓偈》節目中自爆曾叫錯女友為Mayanne而激嬲女友，他昨日賣口乖表示︰「係我過意唔去，女朋友同Mayanne好唔同，我同女友係一見鍾情，佢好靚；但Mayanne就內在多啲，要識耐咗先發掘到佢嘅內在美。」6號表示通常與Mayanne做完節目後才會嗌錯名，他笑言︰「我都成日叫錯女朋友做Do姐（鄭裕玲）同肥媽，但我澄清同肥媽係無緋聞嘅。」

專一最重要

兩人打風都打唔甩，是否好事近？6號直指自己是傳統的人，要先買樓才考慮人生大事。他說︰「要睇林鄭月娥，希望樓價再調整下，買樓郁啲都要七位數字，先安居後談婚，希望年中可以睇中啱嘅單位。」他又笑言︰「如果買隻純銀戒指求婚，唔係結婚，係分手。」問Ayan是否非君不嫁？她笑笑口謂︰「呢條問題咁難答嘅？都唔係㗎，我都有好多選擇㗎。（要咩條件？）專一係最緊要嘅條件，每個女仔都需要，其他門面嘢都唔係重點。」

撰文︰倪小珊

編輯︰李潔盈

美術︰顏玉玲