最近TVB劇集《荷里活有個大老千》正在熱播，呢套劇除咗有鄭則仕、秦沛、湯鎮業幾位好演技男星之外，仲有行內岀名老戲骨嘅「配角天后」金燕玲，佢喺劇入面飾演鄭則仕舊情人丁鈴。金燕玲岀道多年，演過無數電視電影，曾四次獲得香港電影金像獎同兩次台灣電影金馬獎最佳女配角，佢仲曾經講過：「只要係有發揮嘅角色，就算無錢收我都會接。」
後生索爆係性感女神
今年已經64歲嘅金燕玲風韻十足，仲係好有魅力，睇翻佢年輕時嘅照片，係一個不折不扣嘅大美人，實在係索到爆，真係同另一個當時公認靚女嘅關之琳有得揮呀！金燕玲初岀道時行性感路線，憑1973年呂奇導演嘅《女人面面觀》成名，其後又拍過性感寫真，樣子標緻身材又好，成為當年不少男性心目中嘅女神。
情路坎坷婚姻迷失自我
金燕玲演藝之路走得好順利，不過佢嘅感情就相當波折重重，半生漂泊不定。1975年，金燕玲同采蝶軒老闆梁廷斌結婚，婚後定居英國，但呢段婚姻六年就結束，原因係金燕玲婚後太過服從老公，斟茶遞水樣樣做足，當時亦無工作，漸漸佢覺得迷失自我，於是選擇離婚返香港繼續演戲。
忍氣吞聲第三者介入家庭
到咗1989年，金燕玲因為意外懷孕嫁畀英國執業大律師Robert Wong，大家都以為佢今次嫁得好，點知無幾耐老公傳出有第三者，金燕玲選擇忍氣吞聲十五年：「為咗畀女兒一個完整嘅家，我哋先勉強一齊生活，到我想離婚嘅時候，仲要係嗰女鼓勵我離開英國。」2005年金燕玲第二段婚姻再度以失敗收場。
重回香港演戲終覓感情歸宿
當時年金燕玲已經50歲，再次返嚟香港演戲，呢個時候就比佢遇到蘇施黃，講到明想照顧佢，成為佢嘅另一伴：「蘇施黃佢同我講鍾意我，要追我，可以無條件安排地方畀我住。我唔鍾意女人，但好現實，我的確需要人照顧。要接受同性感情並唔容易，我好介意人點睇，從來冇諗過最後會同個女人一齊，但阿蘇感動咗我，其實錫你嘅人，無論系方、圓、黑定白，都系冇分別。」
之前蘇施黃仲公開講過要賺兩億照顧金燕玲下半生：「如果我死咗，都唔希望佢生活質量下降，我當然想佢下半生無憂。」金燕玲半生漂泊，經歷咗兩次婚姻失敗，如今終於揾到愛鍚佢、照顧佢嘅人，令人好替佢高興呀！