【聲明】港生活網站並無進行電話推廣活動

中大文物館賀歲展覽 欣賞罕有龍袍祭器

發佈時間: 2019/01/28

為迎接豬年來臨,黛安知道中大文物館即日起至5月5日,會同時舉行「皇朝禮器」同「己亥說豬」賀歲展覽,展出60多件清朝祭器、乾隆年代製嘅龍袍,仲有20餘件與豬相關嘅文物,好值得睇下!

其實豬喺中國幾千年歷史中,流傳咗好多故事同傳說,好似《西遊記》嘅豬八戒咁,如果大家都想了解更多豬嘅故事,不妨去中大文物館展廳I,睇下展館同本地收藏家珍藏與豬相關嘅20餘件文物。除咗豬文物,仲有60餘件清朝祭器,和乾隆年代製嘅龍袍,全部都係1748年至1911年間,《皇朝禮器圖式》所載嘅罕見祭器,包括色瓷質祭器、銅器和漆器。聽講《皇朝禮器圖式》所錄嘅祭器,只有極少數流傳於世,今次嘅展覽就會史無前例咁,帶大家走近清帝祈求神明指引、福佑天下嘅祭祀現場。

公關姊妹話,今次要多得客席策展人郭家彥博士,同埋懷海堂堂主鍾棋偉,慷慨惠贈清朝祭器,令文物館成為兩岸故宮博物院外,擁有最多清朝祭器嘅博物館。

撰文: 黛安 消息特靈八卦公關
欄名: 八卦名利場