TVB處境劇《愛回家之開心速遞》口碑不俗，決定添食到720集，為咗令新劇情更加豐富，劇組連日來進行大改革。隨著劇中最受歡迎情侶之一Mandy（謝芷倫飾演）與博士（馬貫東飾演）被安排去英國讀律師正式離開，劇組又宣佈之後會有楊玉梅飾演的新角色加入。不過有新角色反而威脅到另一個爆紅角色大小姐（林淑敏飾演）的地位，事關楊玉梅會做闊太同大小姐爭送水輝（許家傑飾演），搞到大小姐都好怕自己冇得留低。近日眾角去留成為網民的討論熱話之一，大家都很怕下一個離開的人是自己喜歡的角色，本來部份網民預測是開刀對象是sell家庭溫暖的根叔（劉丹飾演）或熊尚善（滕麗名飾演），怎料最新遭受毒手的人原來是得到不少年青觀眾支持的搞笑丑角傻強馮奕森！
(TVB電視截圖)
傻強步Mandy後塵 連露面講再見都冇
最新一集《愛回家》剛開始就見到傻強兩位好兄弟安仔（周嘉洛飾演）和凌凌（吳偉豪飾演）在宿舍為執拾細軟。當大家還不明所以時，安仔就解釋原來傻強收到西伯利亞大學的獎學金，所以馬上走人轉校；而凌凌亦補充：「傻強話呢，佢成績咁差都有人收，佢驚嗰邊啲人調亂咗成績表，所以佢拿拿臨飛過去，就霸住個學位先喎。傻強計過數㗎喇，佢話如果喺嗰邊讀書嘅話唔使交學費，仲有獎學金同生活津貼。如果佢儲埋嗰啲錢就可以寄返嚟香港俾佢啲細佬妹做生活費。」兩個一唱一和，好詳細咁解釋傻強突然離開的原因，心水清的觀眾都聽得出這番話是特別交代給大家聽。不過安仔、凌凌、傻強的廢青3人組明明好受歡迎，昨晚還有3人同場搞吓笑的時間，為什麼傻強會突然步Mandy後塵，連露面講句再見的機會都沒有？
(TVB電視截圖)
(TVB電視截圖)
雖然冬菇頭、厚眼鏡、常常眨眼流口水，的毒男傻強同安仔一樣搞笑戇直，經常製造笑話，又非常天真，演活未出社會工作的年輕人日常生活，年輕觀眾好喜歡他；不過相比起安仔的廢青心態，傻強這個角色其實好有立體感，表面是個搞笑、傻更更的角色，但實際上卻是個悲劇人物。傻強本來家境富裕，自從6個弟妹陸續出世之後才家道中落，為了供養弟妹，他一人肩負起父母責任獨力照顧家庭。不過身為大學生的傻強開支好大，學費、宿舍費、生活費，他不得不節食縮食，日打幾份工賺錢，舊東西用得就用，爛就補。即使要去西伯利亞，他都帶同剪刀想為當地人剪髮，賺外快寄錢俾弟妹買口水肩，是個很懂事又有責任心的年輕人，值得大家學習，孝順仔、好哥哥形象深入民心，好受中年觀眾的支持。
(TVB電視截圖)
(TVB電視截圖)
傻強戲如人生做家庭支柱 窮到做地盤茶記零娛樂
現實生活中飾演傻強的演員馮奕森的人生同樣好慘情。3歲時，馮奕森跟隨媽媽從大陸移居香港，原本爸爸在大陸有兩間製衣廠，有玩不完的玩具，但生意失敗之後他就性情大變，不時與馮奕森媽媽為錢爭吵，差點發生流血事件，那時候精神壓力很大，甚至留下陰影：「冇本事真係唔好生仔，除非我百分百肯定自己有足夠嘅經濟條件，可以令個仔無憂無慮咁成長，否則我唔會結婚生仔。」中學時父母離婚，剛畢業的馮奕森頓時成為家中經濟支柱，為養家甚麼工種都要做，如地盤、茶餐廳侍應及售貨員等。不過一直好想做演員的馮奕森不想向現實低頭，2013年他報讀第27期藝員訓練班，成功入行。
可惜入行初期馮奕森大多飾演行行企企的路人甲乙丙，雖然收入僅夠糊口，不過他堅持要俾家用，寧願放棄娛樂，自己捱窮，或者問朋友借錢過活：「我會將4成當家用，2至3成為水電費，其餘則就車馬費，慳啲洗都可以過活。我要顧及屋企人，特別係初入行人工唔高，自己同屋企人都會好辛苦。基本上我係零娛樂，唔會有多餘錢去做其他嘢，未必人人捱得到但我可以。」捱咗幾年，馮奕森遇到從影以來戲份最多的傻強，終靠《愛回家》彈起，行出街都有好多街坊都認得，叫他做阿強，他好欣慰：「依家只係想努力工作，俾到媽媽較安穩嘅生活。」本來事業剛有起色，如今馮奕森突然「被」離開，好多網民、觀眾都表示不捨得，又擔心馮奕森現實生活的經濟情況成問題：「先走Mandy再走傻強，聽講佢真人都好窮，咁點解」、「睇到都吓左出黎囉，連一集交代都冇」、「傻強真係演得好好，而且角色咁有特点，又搞笑，希望佢能返嚟」。
(馮奕森IG截圖)