【愛回家】Eddie捱足20年苦盡甘來 窮到靠阿媽車馬費生活

TVB處境劇《愛．回家之開心速遞》繼宣佈添食到720集之後，趕緊在新年之前完成大改革，先用留學藉口踢走相當受觀眾歡迎的博士（馬貫東飾）、Mandy（謝芷倫飾）以及傻強 (馮奕森飾)，再加入新角色開支線撐場。第一個就是介入大小姐 (林淑敏飾演) 與送水輝 (許家傑飾演) 戀情的招太 (楊玉梅飾演)；第二個是熊家親戚 (盧苑茵飾演），將會上門拜年；第三個竟然是Eddie 彭懷安，他將會搖身一變由光頭變長髮，在劇中飾演奸角大飛哥，網民都表示好期待。雖然入行多年大多做奸角，不過現實中的Eddie原來好乖，一段時間窮到冇錢開飯，影響家人，直言：「好對唔住媽媽」。幸好如今冰室生意上軌道，又有新角，終於苦盡甘來！

參考黃秋生大飛哥演繹 做大奸角威脅送水輝

對於有得在《愛回家》做奸角，Eddie話好興奮：「鍾意返屋企嘅大飛哥，愛回家、開心速遞，估唔到喺愛回家都可以做壞人。」，他表示將會於《愛回家》第537集出現，去送水輝（許家傑飾演）的酒吧搗亂。跟據監製要求，今次角色會以黃秋生在《古惑仔激情篇洪興大飛哥》裡面的大飛哥一角作為藍本，所以無論演繹、同戴上太陽眼鏡配上長髮的造型都會跟足電影咁做，與他平時的光頭形象截然不同。對於角色最大挑戰，Eddie笑言：「應該係把長頭髮啦，終於都有頭髮嬲住，要坐定定俾人set頭好唔慣！雖然未知之後個角色仲會有咩發展，不過做到《愛回家》已經好開心喇，睇吓反應係點先，同家傑又好，同豹哥有對手戲又好，總之有得做就得。」明明於合家歡時段同樣又要做奸角，入行20年做壞人多過好人的Eddie指已經習慣了：「做奸角又好反派又好都冇問題，我咁嘅樣衰衰格格，唔做衰人嘥晒啦，來年想做好一個衰人！」

{{hket:inline-image name="14.jpg"}}{{/hket:inline-image}}

{{hket:inline-image name="15.jpg"}}{{/hket:inline-image}}

曾窮到靠阿媽錢生活 入行20年苦盡甘來兩邊走

今次Eddie加入做大奸角，不少網民都紛紛留言表示好期待，入行20年終於苦盡甘來，以前有段時間Eddie都捱得好辛苦，甚至形容為度日如年。1999年，Eddie以EO2樂隊成員身份出道，與Eric、Osman、Otto出過多張唱片，全盛時期只有2首熱爆歌曲《魅力移動》、《普通朋友》，其餘時間工作量都唔多，加上活動酬勞要分拆5份，Eddie窮到連零用錢都冇，當時的生活可謂非常拮据。回想那時候Eddie都話好艱苦，多得母親沒有嫌棄，甚至主動拿出車馬費給Eddie維持生活開支：「去到後期冇乜嘢做，冇show出，嗰陣可以話係度日如年，仲有諗過放棄。不過我媽真係好好，我冇錢交交家用，佢仲自動自覺放低錢俾我，令我捱過最艱難嘅時期，我好對唔住、好後悔。」

▼Eddie好錫媽媽，不時帶她周圍去，又常常吻她表達愛意

{{hket:inline-image name="13.jpg"}}{{/hket:inline-image}}

{{hket:inline-image name="12.jpg"}}{{/hket:inline-image}}

{{hket:inline-image name="11.jpg"}}{{/hket:inline-image}}

幸而Eddie聽經理人建議於2011年嘗試做生意，入股華星冰室擔當起管理工作，包括樓面、廚房、收錢、清潔、買貨、會計，甚麼都要落手落腳做，終於愈做愈出名。現在冰室已有6間分店及1間小菜館，發展迅速，成功解決生活問題。原本Eddie已經要忙到生意、拍劇兩邊走，咁啱近期因為《大帥哥》軍閥麥先根被網民獲讚做得入型入格，演技突出，被睇中加入《愛回家》做大奸角，戲份變多，Eddie仲要報讀課堂學做戲，更加勤力，原來他想同時做到好老闆同好演員。Eddie:「其實我依家反而想再學多啲嘢，對自己啲戲要有要求，令啲戲再好啲。依家我跟蝦頭（楊詩敏）師傅學戲，有10堂，會教我哋釋放自己潛能，學到幾多得幾多！」明明事業起飛，已經足夠養活家人，但Eddie依然對自己好高要求。聽完Eddie咁講都覺得好激勵，希望咁有心的藝人可以有更多演出機會，試吓除咗奸角以外的角色吧。

{{hket:inline-image name="17.jpg"}}{{/hket:inline-image}}

{{hket:inline-image name="16.jpg"}}{{/hket:inline-image}}