正在熱播的TVB劇集《荷里活有個大老千》中，張慧儀飾演鄭則仕的前度，劇中她對鄭則仕有情有義，當知道他被冤枉藏毒，答應做與湯鎮業的情人以換取鄭則仕在獄中平安。現實中張慧儀也是個為重要的人甘願犧牲事業、愛情的人，而那個人原來就是養子張晃維Hanson。現年48歲的張慧儀情路非常坎坷，曾經傳出被夫婚夫虐打，直到在北京領養天生有重病的囝囝，她瘋狂出show賺取百萬醫療費同學費，窮盡一生精力獨自把他養大。13年來，張慧儀猶如生母一樣把他放在第1位，即使有真愛、有戲找她拍，她都一一拒絕，全因養子不喜歡。
將養子放第1位 甘願放棄事業同愛情
睇劇都見到就到5字頭的張慧儀依然好靚女，凍齡有方，所以身邊都幾多追求者，惟之前2位前度都未能接受到自己有養子，結果無疾而終，兜兜轉轉還是做返單身女強人。第1個男朋友不太重視其囝囝，張慧儀寧願單身；第2個是3間公司的董事，本來她覺得對方是個很合適的人，二人已經去到談婚論嫁階段，但因為對方小朋友未能與囝囝和平相處，張慧儀寧可犧牲歸宿，由自己一人繼續照顧囝囝。現在張慧儀不強求愛情：「如果對方同我呢邊做唔到平衡，咁佢就唔係我要搵嘅人，唔好嘥時間。拍拖邊個唔想？真正愛我嘅人唔會介意，仲會將我囝囝放第1位，唔接受囝囝嘅人唔會係同我行到老嘅人。好多人都問我咁為Hanson付出值得嗎？我答案係絕對值得。」
沒有另一半幫忙，張慧儀要更加努力接job賺錢，帶住他在身邊出席劇集宣傳。可是囝囝不讓她接暴力、暴露的角色，因為他不喜歡媽媽太性感：「以前成日演性感女人、壞女人，近年唔係自己唔想演，而係囝囝唔鍾意。佢對我好嚴格，唔要我做壞人，又唔要我性感。我著背心都話，會指住我心口，叫我唔好着得咁低，個心口唔可以俾其他人睇，不過我完全冇問題。」張慧儀聽晒囝囝話，竟然甘願放棄愛情同部份事業，認真唔話得！
遇人不淑被虐打想尋死 由性感女星變慈母
當年張慧儀在馬來西亞霹靂州怡保出世，1992年勇奪馬來西亞怡保區華裔小姐冠軍，之後加入TVB開始演員之路。由於張慧儀樣貌嫵媚又身材豐滿，早期她拍過情色片《強姦3OL誘惑》及《原始武器》，一直被人視為性感女星。直至2003年，張慧儀傳出被當時的未婚夫虐打，無論愛情觀還是情緒都大受打擊，一度離開娛樂圈，甚至曾經想過尋死。後來張慧儀在2007年做義工探望「平安之家」福利院時，遇見一個被父母遺棄的男孩對她喊了一句媽媽。那時張慧儀頓時母性大發，收養了他。
然而囝囝患有嚴重先天性心臟病，曾試過腦缺氧影響說話能力。為了支付過百萬的醫藥費和學費，13年來張慧儀由貪玩、愛夜蒲的少女變身成溫柔慈母，早上穿州過省做生意，又復出拍劇賺錢；夜晚跟兒子講故事和烹飪，親手照顧孩子起居飲食。月前囝囝入院做了近10小時的手術心臟大手術，張慧儀好大壓力，驚到有創傷後遺症：「手術費超過七位數字，我呢2年都不停接戲賺錢，雖然係辛苦，但幾崩潰都要撐住，佢就係我心肝椗。幾個月我休息照顧佢，冇咗好多收入，手術期間感受到切膚之痛，成個好似俾人挖空咁。手術完咗，佢連我係邊個都唔知，我嘅惶恐非筆墨能形容，當時已作過最壞打算。無論佢變成點，媽媽都唔會離棄佢。」
儘管張慧儀付出心機、時間、金錢，努力做好廿四孝單親媽媽，不過外界依然不理解，張慧儀一於少理：「唔想同佢分開，身體勞累我都仲可以支撐，攰咪休息囉，希望守護住佢，我只差冇陀佢嗰10個月！多謝囝囝令我感受到真愛，愛係冇需要血緣，假如佢真係走先，我亦會為佢創立『慧儀之家』照顧更多孤兒。」除此之外又於上年正式加入兒童心臟基金會執行委員會，呼籲大家支持基金會的 工作，幫助先天性心臟病患兒童克服於康復過程中面對的困難，很有善心。