最近《愛．回家之開心速遞》進行大改革，除咗楊玉梅、Eddie彭懷安先後宣佈加入劇組，琴晚大年初三盧宛茵（Madam Lo）竟然都以酷似動畫《超人特工隊》E夫人的造型出現，做新角色崔Auntie。劇中她說話尖酸刻薄，對住熊家無句好話，大家為了應酬她搞到一頭煙，關係七國咁亂。觀眾激讚只有盧宛茵能演活黑人憎親戚，紛紛希望她正式加入劇組。講起上嚟現年65歲的盧宛茵入行46年以野蠻、強勢類師奶角色深入民心，其演技實力毋容置疑，但原來現實中她的性格與劇中大相逕庭，年僅22歲就結婚，婚後茵為家庭息影，想專心做家庭主婦，惜感情破裂，唯有復出養家，做單親媽媽照顧3個子女，難怪她做起媽媽角色上嚟更加唯妙唯肖。
盧宛茵新角色搞亂《愛回家》觀眾跪求留低加入劇組
故事講述本來住在加拿大的崔Auntie又要往熊家拜年，單單接待她已經令大家非常頭痛，事關她前年一入門口就諸多挑剔，由升降機到牆壁都批評一番，之後更加將熊家成員的缺點一一數出，嘲諷他們將會鰥寡孤獨。對住若水（呂慧儀飾演）就講：「你生得咁高，唔怪得之嫁唔出」；對住心如（蘇韻姿飾演）就話：「你唔出聲我以為你係工人」等......尖酸刻薄、口沒遮攔的性格讓人大感尷尬，完全招架不住，是個極之黑人憎的親戚，人人見到都想調頭走。今年她再次來臨，根叔（劉丹飾演）遂打算讓家人攜伴見她，大show幸福。
(TVB電視截圖)
不過熊尚善（滕麗名飾演）、David（湯盈盈飾演）、龔燁（張景淳飾）卻因突發事未能赴約。為了成功顯示幸福，結果熊家關係大兜轉，個個被迫交換伴侶，例如潮偉（袁文傑飾演）同若水一齊、安仔（周嘉洛飾演）就同池美麗（鍾凱淇飾演）。原本劇本都幾好，點知Bonnie（林凱恩飾演）、朱凌凌（吳偉豪飾）等亦紛至，龔燁、熊尚善、David又突然無事可以回來拜年，根叔索性繼續做埋場戲，尚善唯有扮食嫩草，同凌凌一齊、David就變成根叔父女戀的對象，亂到一個點！然而，他們都難以忍受內心的情感，紛紛同真實伴侶攬攬錫錫，大講甜言蜜語，搞到崔Auntie以為大家荒淫無度，鍾意出軌偷食，於是憤而離席。最終根叔坦承一切，二人在赤口之日動起肝火，大吵一場。雖然崔Auntie出現搞亂《愛回家》，不過正因為她的刻薄同熊家的溫馨擦出火花，反而好得觀眾歡心，大讚她演技出色：「佢戰鬥力好強，如果加入收視一定攀升！」、「其實搵佢嚟做都幾好，吸引到唔少人睇」。
(TVB電視截圖)
單親媽入行46年演活野蠻奶奶
從2014年網上短片《公屋．居屋．私樓》扮演惡外母，到《BB來了》飾演強勢奶奶不斷插手囝囝家事，與媳婦對立，演到街知巷聞，現年65歲的盧宛茵真人其實一點也不野蠻，相反她是個單親好媽媽，兼夾是位敬業樂業的演員。1973年，盧宛茵決定瞞住父母，面試時高唱英文歌成功參加第2期藝員訓練班。之後盧宛茵在《朱門怨》憑二少奶一角走紅，當年外出有觀音兵隨身，可是她只情迷於只打了幾次招呼的第一代新聞王子何鉅華，愛情至上的盧宛茵笑言：「呢個係命運，係好愛好愛先結婚㗎！我已經22歲，驚『攝灶罅』所以拿拿聲嫁」1975年，盧宛茵好快就結婚成為何太，婚後為了全心全意照顧家庭，竟然選擇在事業高峰期息影幾年，盡好做母親的責任。由當紅花旦變做全職家庭主婦，有人覺得她浪費最好的青春件華，有人又覺得她錯過上位時期，盧宛茵沒有後悔：「我唔覺得喎，唔係趁後生生兒育女會覺得好遺憾，嗰時啲小朋友細要照顧佢哋先冇做幾年嘢。依家連孫都有好開心，我鍾意兒孫滿堂。」
(TVB電視截圖)
(TVB電視截圖)
13年過去，二人的感情愈來愈淡，盧宛茵帶着2個仔、1個女主動提出離婚，令人稱慕的婚姻還是要走向盡頭。當時年紀尚輕的幾個仔女等人養，34歲頓時成為單親媽媽的盧宛茵決定復出拍劇，賺錢養家。雖然性格開朗，但一開始復出參演《季節》期間盧宛茵不時回想起幸福的舊日子，常常感到不開心。後來盧宛茵一直保持單身，與前夫甚少聯絡，通常是由仔女代為聯絡。幸而幾個仔女都好孝順，成家立室，她早就榮升嫲嫲，一家人感情好好，所以盧宛茵都好滿足：「兩個人相處好難，不過如果沒有選擇結婚呢條路，可能又會錯過咗依家啲仔女同孫！依家咩年代啫，好多人單親，跟自己姓都得啦。做人要堅強，唔可以軟弱，面對逆境就要勇敢去面對，依家我好滿足㗎喇。」
面對幾個仔女同孫，盧宛茵既是慈母，又是朋友，她從不擺架子，亦不會管束任何人：「自己都憎被人管，點會咁對仔女？呢樣唔准、嗰樣唔得，佢哋就會反叛，佢哋學咩、去邊玩，我好少過問，依家佢哋都係咁教我啲孫。」至於對住媳婦，盧宛茵更加不是野蠻奶奶：「我好怕古老思想，唔鍾意斟茶跪禮嘅繁文縟節，有時見到靚唇膏都會買俾新抱，佢哋見到好嘢都會送俾我，大家像好似朋友就最好。」聽完覺得盧宛茵真的好厲害，明明真人咁好，果然是實力派！