就到情人節，上年有田蕊妮主持《1+1的深情》安排不同藝人為另一半炮製暖心驚喜，今年就有44歲的幸福人母車婉婉主持全新節目《1+1+1》，請來梁詠琪、楊潮凱、黎諾懿、張達倫、陳柏宇等擔任嘉賓，大談湊仔經。不過未介紹星級爸媽的家庭之前，這位主持人的人生路也不是一帆風順。以前有段時間車婉婉諸事不順，篤信玄學的她曾被相士批命絕不會結婚生仔，令她對組織家庭不存希望。不過其後車婉婉改信主，遇到比自己年輕5年的中澳混血兒老公，還成功以高齡產婦身份誕下混血靚仔囝囝，一家三口幸福美滿，證明人定勝天。
聲帶用到爛不能再唱歌 再被狠批會孤獨一生
原本車婉婉是個全職歌手，中學開始已經不時到其他男校唱歌表演，曾特意遠赴英國練習唱歌，1992年新秀歌唱大賽奪冠入行之後，斷斷續續出過幾張唱片。不過她最為人熟悉竟然不是音樂作品，而是喜劇《皆大歡喜》裡面巴渣毒辣的萬貴妃一角，以及她的星座書。車婉婉迷信玄學，又很喜歡研究星座，是娛樂圈裡面的神婆，2002年拍完《皆大歡喜》離開電視台和樂壇之後，她就加入商業一台主持節目講星座。可惜2003年車婉婉開始走進人生低谷，失戀、喉嚨生繭不能再唱、母親惹官非又再病逝。回想當初的日子很痛苦：「人生急轉直下，我唔係嗰啲會向朋友傾訴嘅人，唔會喊住話唔開心，唔想帶俾人負能量，屈嚇屈嚇把聲就生嘢唱唔到。嗰幾年落K坐埋一邊飲嘢……結果生嘢、冇得唞、唱唔到冇得發洩就再嚴重啲。直到有一日徹底變沙，呢把我曾經呢世人引以為豪嘅聲線已經用到爛，冇辦法再表演。」想唱又不能唱，車婉婉唯有繼續做電台，把聲長期缺乏休息，醫生話生繭割咗都會再生，跌入惡性循環之中。
車婉婉未試過為自己起壇占星算塔羅，反而最低迷的時候她突然去找相士算命。可是個個相士都狠批她不會結婚，不會有兒女：「我記得係猴年，個個都話我猴年唔嫁就一世都嫁唔出...我都跌咗落屎氹啦，你使唔使再兜頭淋多篤屎落嚟呀？」當年已經是猴年，要趕及一年完結前拍拖結婚做齊，車婉婉自知根本冇可能。本來已經大受打擊的她心裡一沉，決定改名，希望藉機改運，打破一世嫁唔出的宿命。
不信邪開展異地戀 結婚生仔唱歌奇蹟圓夢
車婉婉沒有因此被打敗，她開始改變想法，變得積極，甚至改變信仰及戒煙：「每個人都試過情場失意、死因未明再俾仔飛，但最低潮嘅時候我都唔會懷疑自己。就算係咁，都唔可以永遠帶住啲包袱，唔係會過去嘅嘢永遠都唔會過到。」終於車婉婉在2010年經朋友介紹認識比自己年輕5歲的中澳混血男朋友Jonathon。男朋友是名遊泳好手，曾代表過香港出賽，世界排名仲入過最高120之內。他性格坦白、簡單，深深吸引著車婉婉，改變她的戀愛觀，教她不用再在意他人眼光。講起第一次拍拖，車婉婉依然很回味：「我哋當眾喺南灣沙灘露天花灑沖身，走到太古廣場又攬又錫，呢啲嘢我做咗三十幾年人都未做過……你影咪影囉，你賠唔賠得返我嗰刻嘅快樂先？係唔係佢？你唔試，就梗係唔會知啦！」
2013年，異地戀拍拖開花結果，二人於泰國布吉成婚，當中許志安、鄭秀文是當天見證的少數圈中人之一。同期車婉婉打破心理關口，重拾唱歌夢，簽唱片公司準備推出了兩首單曲，其中一首是慶祝結婚的《一加一》，之後更加她在牧師演唱會上獨唱鄭秀文歌曲《上帝早已預備》：「冇人知我連K都唔敢唱，突然間有日要由台下升起到紅館正中央要衝破幾多心理障礙。」除咗愛情、事業兩得意，車婉婉仲以43歲高齡產婦身份成功順產，誕下8磅9安士的「巨B」囝囝Justus（花名BBQ）。囝囝擁有4分1澳洲血統，眼睛和頭髮的顏色遺傳了外國人的金髮碧眼，但其五官就似足車婉婉，超可愛。每次車婉婉instagram一post囝囝相，like數即拋離自己，證明幾受歡迎。早前囝囝在田蕊妮的《女人四十》中亮相，即引來不少觀眾羨慕車婉婉的完美人生。車婉婉感言：「以前一直覺得43歲嘅年紀，根本唔適合生，但真正為人阿媽後，反而嫌自己點解咁遲先生育，依家先真正做到一個完整嘅女人，先度過一個完整嘅人生。」真係好彩當初信自己，如今幸福滿載真係可喜可賀！