馬蹄露演活刁蠻「MayMay」 私下低調行善幫老人家勁有愛心

《真情》呢部經典處境倫理劇集係不少香港人心目中嘅集體回憶，劇集從1995年至1999年，合共播岀1128集，而繼2007年重播後，近日再次於TVB星期一至星期五於早上10點半播岀，大家又可以重溫呢部經典劇集啦！

{{hket:inline-image name="14607007_255811078166853_4547274140486205440_n.jpg"}}{{/hket:inline-image}}

《真情》當中有無數經典角色和情節，除咗薛家燕飾演嘅「好姨」同黃錦燊嘅「貓屎」，至今仲讓人記憶深刻絕對係超乞人憎嘅「MayMay」，馬蹄露將刁蠻大小姐「歸亞美」演得非常成功，搞到當時好多觀眾好憎她，最印象深刻係馬蹄露「MayMay」為咗挽回鄭子誠「子浩」，竟然遵從佢嘅無理要求，當眾食泥，真係睇到觀眾眼都突埋。馬蹄露仲憑此角色於1997年《萬千星輝賀台慶》獲得「最厭惡角色演繹大獎」，都是至今唯一的得主，因之後就再沒頒發此獎。

{{hket:inline-image name="ddddddddddddd.jpg"}}{{/hket:inline-image}}

（TVB電視截圖）

馬蹄露入行多年，成日演岀醜角同八婆等唔討好的角色，不過佢一啲都唔介意，不論有無對白，馬蹄露都會盡力去做好每個角色，「就算只有幾句對白，都可以做得好好，都可以好搶戲。」佢仲話：「唔介意比人話我醜樣，但每個演員都唔想被定型，我哋仲有好多可能性。」不過馬蹄露就感嘆自己年紀愈嚟愈大，唔知可以演到幾時：「愈唔後生，戲路就愈受限制，所以要快啲演多啲戲！」可能因為咁，馬蹄露近年都積極向多方面發展，佢有個侄仔叫馬米高，係一名YouTuber，而馬蹄露不時係佢嘅YouTube頻道亮相客串，佢哋之間有趣嘅互動都幾搞笑，睇嚟馬蹄露都有機會向KOL界發展！

{{hket:inline-image name="45718443_2067281013513313_4385377366898114560_n.jpg"}}{{/hket:inline-image}}

（馬蹄露FB圖片)

{{hket:inline-image name="yyyyyyyyyyyyyyy.jpg"}}{{/hket:inline-image}}

(馬米高YouTube影片截圖)

其實馬蹄露本人絕非劇集入面咁衰，而係非常有愛心，經常低調做善事！馬蹄露家住大埔，不時會買嘢食俾路邊執紙皮嘅婆婆，仲要虛寒問暖，之前有網民親眼目睹佢嘅善舉，仲打左上網：「在大埔海寶花園畢打奧餐廳附近，零晨時分，馬蹄露不單阻止街上拾荒婆婆隨街撿食，仲買埋嘢食俾婆婆。真係好好心!」而早年政府一意孤行將大埔龍尾嘅泥灘變成人工沙灘，當時馬蹄露亦有挺身而出，為居民發言反對計劃，非常仗義！馬蹄露仲話：「老人家係最需要得到關懷的！我希望人人都敬老同關愛有需要嘅人！令世界更美麗！」馬蹄露入行多年，作為演員認真做好每個角色，唔介意對白多少，默默低調行善，真係好值得大家欣賞！

{{hket:inline-image name="39196788_2015101408731274_6192236985537527808_n.jpg"}}{{/hket:inline-image}}

（馬蹄露FB圖片)