當一個社會生活環境愈好，就會有愈多人在飲食、運動上著手，追求健康生活。特別以藝人嚟講，他們的身形、外表是大眾指標，加上壯健或窈窕的好身形可以吸引更多廣告商，所以近年不難看到藝人們去健身房或行山的相片，希望時刻保持最佳狀態。不過除咗男藝人要健身，女藝人紛紛加入運動行列，當中54歲的劉美君就是一個好榜樣。雖然已經踏入5字頭，但她依然凍齡兼瘦身有方，屈機過成班後生成截的花星好多。為了大家新年後回復美態，不如睇睇她有甚麼絕招！
▼20年前
▼現在
54歲獲封最美嫲嫲 勁過TVB成班後生花旦
回帶返去幾十年前，劉美君1982年以18歲之齡嫁給電影導演黃泰來，並育有一對子女，是香港娛樂圈中少有的早婚女藝人，婚姻維持10年之後以失敗告終。2002年，劉美君與第2任丈夫結婚並移民並定居美國，再誕下一女，二人婚姻於6年後亦宣佈告終。去到第3段感情，劉美君與混血男朋友Steve拍拖8年，前年又宣佈和平分手。雖然愛情路上滿佈荊棘，但劉美君沒有氣餒，反而因為回復單身身份，生活更自由自在。早已在2014年升呢做嫲嫲的她弄孫為樂，常常被孫囝Mason與孫囡Madison氹得非常開心，仲不時將嫲孫生活放在社交平台網民分享。
近日劉美君趁新年休假期間又往美國探孫，上載與孫囝Mason錫錫的合照，大sell溫情。縱然踏入5字頭4年，但外人完全看不出她已是嫲嫲，事關她面容、身形與20年前毫無分別，甚至擁有非常結實的6舊腹肌及超靚馬甲線，被網民讚屈機過TVB一眾90後花旦：「Keep得咁好，劉穎鏇要學吓啦！」、「如果搵佢喺ViuTV拍健身節目，分分鐘可以同TVB對撼」。
健身36年練出腹肌 揭凍齡瘦身秘訣
影相之前，劉美君自爆已經做了70分鐘瑜伽然後再做了5分鐘planking，難怪身形咁fit。不過咁耐以嚟，呢位嫲嫲之所以可以keep得咁好，原來有好多凍齡兼瘦身的秘訣：
1. 心態保持年輕
早前劉美君於ViuTV之邀擔當《全民造星》導師之一，雖然年紀最大，但心境反而最年輕，經常大爆睇世界盃或選秀節目都是睇靚仔。除咗平時工作以外，劉美君最大樂趣就是到加州搵2個孫玩，曾經試過搶孫囝架3輪小朋友單車踩，勁有童心。
2. 36年不斷健身冇停過
唔講唔知，原來劉美君早於18歲已開始健身習慣，經常鍛煉肌肉：「如果身體冇肌肉 support，到年老開始瘦就會鬆弛。」如今劉美君為了健美卻不遺餘力，不時穿上性感bra top及貼身褲做重訓、跑步，用汗水換取幼腿、翹臀與腹肌，成為健美女神、美魔女，值得我們學習。
3. 專做高難度瑜伽
自38歲起，劉美君就覺得單單做健身不能令身心都達到健康，所以決定學埋瑜伽。每天5、6時天未光就會起床練瑜伽，每星期至少做3次，用行動證明，玩瑜伽不受年齡同身體狀態限制。如今她已經可以掌握任何高難度動作：「以前唔識放下、平衝，練瑜伽後我身心都放鬆，睇嘢方法都唔一樣。」
4. 6點起身、10點上床瞓
劉美君習慣早睡早起，身體基能才會保持年輕：「後生已經玩夠，30歲定居美國後唔使再兼顧工作，每晚10點瞓，朝早6點起身，除咗拍戲夜班冇辦法，但捱完1、2晚會要求瞓1晚，唔會俾自己overload，20幾年嚟一直保持。」
5. 食回春餐單，7點後絕食
早餐：250-500克乳酪，留意番，大部分農場為谷肥牛牛用穀類尤其粟米做飼料，肉質肥美但欠健康，所以揀乳酪一定揀用草做飼料、良心農場出品。
午餐：12-14安士牛扒一件，或魚扒及其他海鮮，配約兩杯蔬菜配菜。
小食、下午茶：有機蘋果1個
晚餐：主要食菜及沙律，視乎饑餓感會加適量蛋白質。重點是不可以飽肚上床睡，劉美君就話個人習慣係7點以後不再進食。但為滋補，間中夜晚會燉花膠、山瑞裙湯補充。