首推超值下午茶 麥當勞歎$16自由組合

麥當勞向來深受趕時間嘅打工仔歡迎，黛安知道，嚟緊又有新驚喜送畀大家。原來由聽日開始，麥當勞「超值選」即將加入全新選擇「芝蛋脆雞飽」，而逢星期一至五仲會首次全新推出「A+B下午茶餐」，每日一到下晝2點至6點，即可以用超值優惠價16蚊，自由組合出多款美食，好抵啊！

公關姊妹同黛安分享，全新嘅「芝蛋脆雞飽」即將於聽日登場，一塊塊鬆軟麵包，夾住外皮金黃酥脆嘅麥香雞塊、軟嫩蒸蛋同軟滑車打芝士，一樣嘢入面就擁有多重滋味，絕對值得期待！而2件脆香雞翼、Oreo®麥旋風都會齊齊加盟埋「超值選」，至於其他原有選擇，好似魚柳飽、細薯條等亦會繼續保留，等大家「麥麥歎、麥麥食」！

唔止咁，麥當勞亦知道香港打工仔平時工作非常忙，所以佢哋同日亦將喺全綫分店首推「A+B下午茶餐」，逢星期一至五下午2點至6點下午茶時段，只需超值優惠價16蚊，就可購買任何一款A區美食加一款B區食品，無論係魚柳飽拼細汽水，定係豬柳蛋配新地，一律都係16蚊！認真平、靚、正，黛安都好期待快啲有得食！

講起2月14日情人節呢個大日子，McCafé亦有新嘢推出，今日起將全新推出期間限定「蜜桃軟心玫瑰蛋糕」，利用精緻玫瑰花造型，配上淡淡玫瑰花香味、濃郁清甜嘅蜜桃果醬，食落甜而不膩，簡直襯晒情人節咁sweet啊！黛安仲知道，一盒2件嘅「蜜桃軟心玫瑰蛋糕禮盒裝」，好貼心咁附送心意卡，無論拎嚟送畀女神表白，定向情人表露心意都相當適合，各位男士記住唔好錯過喇！