馬會馬術隊兩女將 劍指亞洲挑戰賽

黛安知道「浪琴表香港馬術大師賽」一向被譽為馬術場地障礙賽大滿貫之一，亦係本港年度馬術盛事，今個星期五至日就喺亞洲博覽館上演，代表香港出戰嘅馬會馬術隊2名騎手賴楨敏同梁巧羚噚日見傳媒，佢哋話到時會全力以赴！

大師賽今年仲新增「香港賽馬會亞洲挑戰賽」，賴楨敏同梁巧羚將會同嚟自中國、台北、日本同南韓等地騎手，競逐25萬蚊獎金嘅錦標。賴楨敏今屆係連續第4度出戰大師賽，佢話好榮幸再有機會同世界級騎手同場較量、觀摩學習，係難得嘅機會。佢覺得過去幾年自己有進步，寄望至少保持舊年嘅成績，期望會有突破，而家迎戰心情仲有啲興奮，仲話一定盡力去做。黛安知道，除咗亞洲挑戰賽，佢仲會參加香港賽馬會金盃賽同埋浪琴表馬術大獎賽！

而第3次喺大師賽代表香港嘅梁巧羚就話，上次參加大師賽已經係2013年，佢自言當年對五星級賽事經驗較少，6年間累積唔少經驗，會以平常心對待，全力以赴。今年嘅大師賽，除咗速度賽外，佢打算參加其他所有賽事。各位馬術迷，真係唔好錯過喇！