蓋世寶不忿TVB每年減薪決心離巢 視迷祝福︰另覓新天地

兒童節目主持蓋世寶（LuLu姐姐）日前受訪時，自爆決心離開效力廿三載的無綫，更披露娘家給其續約條件是要勁減三分一人工，令她心灰意冷。很多視迷支持LuLu姐姐向外搵出路；有人則覺得她已非青春少艾，離巢未必有好處！

今年40歲的蓋世寶，先後主持《閃電傳真機》、《至Net小人類》及《放學ICU》等兒童節目長達18年，陪伴不少90後及千禧後成長。不過，自從15年無綫解散兒童組後，近年她轉型拍劇，亦有參演《超時空男臣》、《愛‧回家之開心速遞》等。

日前她接受傳媒訪問，竟然宣稱已決定離開娘家，三月起回復自由身，更踢爆TVB要求她減薪三分一才肯續約，由13,000減至7,000多元。她直言轉戰戲劇組後，已經每年減人工，並說︰「我睇唔到前面有更多路，好似拍拖咁，無將來不如算！」

自嘲唔夠假難立足

蓋世寶特意在訪問中暗示自己有骨氣，全因唔識擦鞋。她解釋：「不少人都提醒我『戲劇組唔適合你』，因為我唔夠假，或者應該話係太有性格，好快就撈唔掂，做Drama（戲劇組）要好識做人！」

對於前路，LuLu姐姐坦言︰「香港人肯做唔會餓死，我從來都無擔心過！」至於網民對蓋世寶怒轟TVB，反應兩極，有劇迷覺得她有能力轉戰ViuTV或北上掘金；有花生友則指她唔識飲水思源。

撰文︰Steven、Pat

協力︰Terri

編輯︰黃寶恩

美術︰Simon