重溫TVB劇集激吻場面 5對情侶戲假情真

多年嚟，TVB有唔少劇集為咗配合劇情所需，都會加入親吻鏡頭。而呢啲咀戲往往就係成套劇集嘅高潮所在！當中有幾對情侶更加係假戲真做，從戲內愛到戲外。趁住情人節，一齊重溫下。

蕭正楠、黃翠如

講到吻戲，蕭正楠同黃翠如就真係勁晒激！當時已經拍緊拖嘅佢哋，喺《幕後玩家》入面唔止鴛鴦戲水，仲半祼咀足30秒。二人早喺2014年，拍攝《師奶MADAM》時撻著，多年嚟一直愛得高調，仲不時以情侶檔出活動搵真銀。去到上年年底，蕭正楠突然喺頒獎禮上宣佈已娶黃翠如為妻，令大家又驚又喜。

馬國明、黃心穎

本為情侶嘅馬國明同黃心穎，喺《宮心計2深宮計》中亦有吻戲。其中一幕，二人緊握雙手，喺床邊含淚咀嘴，睇到觀眾非常感動。據知二人因拍《為食神探》而撻著，不過一直非常低調。即使多次被影到出雙入對，但都未有承認拍拖。直至上年，二人結伴歐遊後，終於大方承認戀情。早前新年，馬國明仲陪黃心穎返鄉下探親，呢位準女婿真係好有心呀！

{{hket:inline-image name="77777777.png"}}{{/hket:inline-image}}

（YouTube截圖）

鄭嘉穎、陳凱琳

鄭嘉穎同陳凱琳（Grace）因合作拍攝《殭》而認識，二人喺戲內都有吻戲。由於拍攝時朝夕相對，日久生情。拍拖三年後，上年8月喺峇厘島結婚。雖然最初好多人都唔睇好依段關係，不過佢哋一直愛得痴纏，早前仲喺社交網站宣佈有喜，即將榮升父母。

{{hket:inline-image name="6777.png"}}{{/hket:inline-image}}

（YouTube截圖）

苗僑偉、戚美珍

1982年，苗僑偉（三哥）同戚美珍喺《飛越十八層》擔任男女主角，戲內其中一幕，三哥主動親吻戚美珍臉頰。呢套劇唔單止係三哥嘅代表作，仲係佢同戚美珍嘅定情作。二人因為拍攝此劇而擦出愛情火花，拍拖8年後拉埋天窗，上個月正正係二人結婚29週年，非常幸福。

{{hket:inline-image name="6778.png"}}{{/hket:inline-image}}

（YouTube截圖）

梁朝偉、劉嘉玲

1984年，梁朝偉同劉嘉玲喺《再版人》飾演情侶，當時劉嘉玲仲將熒幕初吻獻咗畀梁朝偉。呢對銀幕情侶拍拖20年，2008年喺不丹舉行婚禮。至今已攜手走過30年，劉嘉玲有時仲會喺社交網站上「放閃」，二人相當恩愛。

{{hket:inline-image name="76767.png"}}{{/hket:inline-image}}

（YouTube截圖）